മുംബൈ: ഇംഗ്ലീഷ് സീമര്‍ ക്രിസ് ജോര്‍ദ്ദാന്‍ ഇന്ത്യന്‍ പ്രീമിയര്‍ ലീഗിലെ അവശേഷിക്കുന്ന മല്‍സരങ്ങളില്‍ മുംബൈ ഇന്ത്യന്‍സിനൊപ്പമുണ്ടാവും. ഈ സീസണില്‍ ഒരു ടീമിലും അംഗമായിരുന്നില്ല ജോര്‍ദ്ദാന്‍. പക്ഷേ മുംബൈ സംഘത്തില്‍ ആര്‍ക്കും പകരക്കാരനായാണ് അദ്ദേഹം വരുന്നത് എന്നത് വ്യക്തമല്ല. രണ്ട് കോടി അടിസ്ഥാന വില പ്രഖ്യാപിച്ച താരത്തെ ലേലത്തില്‍ ആരും വിളിച്ചെടുത്തിരുന്നില്ല.
പക്ഷേ റോയല്‍ ചാലഞ്ചേഴ്‌സ് ബെംഗളുരു, സണ്‍റൈസേഴ്‌സ് ഹൈദരാബാദ്, പഞ്ചാബ് കിംഗ്‌സ്, ചെന്നൈ സൂപ്പര്‍ കിംഗ്‌സ് എന്നിവരുടെ നിരകളില്‍ കളിച്ചിട്ടുണ്ട്. മൊത്തം ഐ.പി.എല്‍ മല്‍സരങ്ങളില്‍ നിന്നായി 27 വിക്കറ്റുകള്‍ അദ്ദേഹം സ്വന്തമാക്കിയിട്ടുണ്ട്. 2022 ലെ ഐ.പി.എല്ലില്‍ ചെന്നൈ സൂപ്പര്‍ കിംഗ്‌സിനായി നാല് മല്‍സരങ്ങളില്‍ നിന്നായി രണ്ട് വിക്കറ്റുകള്‍ സ്വന്തമാക്കിയിരുന്നു. നിലവില്‍ മുംബൈ സംഘത്തില്‍ ജോഫ്രെ ആര്‍ച്ചര്‍, തൈ റിച്ചാര്‍ഡ്‌സണ്‍, റിലേ മെറാദി എന്നീ വിദേശ ബൗളര്‍മാരാണുള്ളത്.