സിംഗപ്പൂരിലേക്ക് ഒരു കിലോയിലധികം കഞ്ചാവ് കടത്താന്‍ ശ്രമിച്ച കേസിൽ അറസ്റ്റിലായ ഇന്ത്യന്‍ വംശജന്‍ തങ്കരാജു സുപ്പയ്യ(46)യെ തൂക്കിലേറ്റി. ചാന്‍ഗി ജയില്‍ വളപ്പിലാണ് ശിക്ഷ നടപ്പിലാക്കിയതെന്ന് അധികൃതര്‍ അറിയിച്ചു. ഒരു കിലോ കഞ്ചാവ് കടത്താനുള്ള ശ്രമത്തിനിടെ 2014ല്‍ ആണ് തങ്കരാജു സിംഗപ്പൂരില്‍ പിടിയിലായത്. 2018 ഒക്ടോബര്‍ ഒമ്പതിനാണ് വധശിക്ഷയ്ക്ക് വിധിച്ചത്. തങ്കരാജു സുപ്പയ്യയുടെ വധശിക്ഷ നടപ്പാക്കരുതെന്ന് ആവശ്യപ്പെട്ട് യുഎന്‍ മനുഷ്യാവകാശ സംഘടന രംഗത്തെത്തിയിരുന്നു. എന്നാല്‍ സിംഗപ്പൂരിലെ ക്രിമിനല്‍ നീതിന്യായ വ്യവസ്ഥയുടെ അനിവാര്യ ഘടകമാണ് വധശിക്ഷയെന്ന് സിംഗപ്പൂര്‍ ആഭ്യന്തര മന്ത്രാലയം വ്യക്തമാക്കുകയായിരുന്നു. സിംഗപ്പൂരിനെ സുരക്ഷിതമായി നിര്‍ത്തുന്നതില്‍ വധശിക്ഷ ഫലപ്രദമാണെന്നും കര്‍ശന സുരക്ഷകളോടെ ശിക്ഷ നടപ്പാക്കുമെന്നും മന്ത്രാലയം അറിയിച്ചിരുന്നു.