ദുബായ്: സ്‌റ്റേജ് ഷോക്കിടെ ഇന്ത്യന്‍ വംശജനായ സ്റ്റാന്റപ്പ് കൊമേഡിയന്‍ കുഴഞ്ഞുവീണു മരിച്ചു. മഞ്ജുനാഥ് നായിഡു(36)വാണ് മരണപ്പെട്ടത്. ഷോക്കിടെ തളര്‍ച്ച തോന്നിയ മഞ്ജുനാഥ് വേദിയിലിട്ടിരുന്ന ഒരു ബെഞ്ചില്‍ ആദ്യം ഇരിക്കുകയും നിലത്തേക്ക് വീഴുകയുമായിരുന്നു. ആളുകളെ ചിരിപ്പിക്കാനായി തമാശ കാണിക്കുകയാണെന്നാണ് കാണികള്‍ ആദ്യം കരുതിയത്. പിന്നീട് അഭിനയമല്ലെന്ന് മനസ്സിലാക്കി ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാനായില്ല. ഹൃദയസ്തംഭനമാണ് മരണകാരണം. കുടുംബത്തെക്കുറിച്ചും പിതാവിനെയും കുറിച്ച് സംസാരിക്കുന്നതിനിടെയാണ് കുഴഞ്ഞുവീണത്. വിഷാദത്തെ അതിജീവിച്ച കഥ തമാശരൂപേണ പറയുകയായിരുന്നു. അബുദാബിയില്‍ ജനിച്ച മഞ്ജുനാഥ് കുറേക്കാലമായി ദുബായിലാണ് ജീവിച്ചുവന്നത്. മാതാപിതാക്കള്‍ നേരത്തേ തന്നെ മരിച്ചു. ഒരു സഹോദരന്‍ മാത്രമാണുള്ളത്. വെള്ളിയാഴ്ചയായിരുന്നു മരണമെങ്കിലും ഇന്നാണ് ദേശീയമാധ്യമങ്ങള്‍ ഇത് റിപ്പോര്‍ട്ട് ചെയ്തത്.