ന്യൂഡല്‍ഹി: ഫുട്‌ബോളില്‍ ഈ മാസം അവസാനം ബ്രസീലിനെ നേരിടാന്‍ ഇന്ത്യ. ഇന്ത്യന്‍ വനിതാ ഫുട്‌ബോള്‍ ടീമാണ് ബ്രസീലുമായി കൊമ്പുകൊര്‍ക്കാനൊരുങ്ങുന്നത്. നവംബര്‍ 25ന് ബ്രസീലിലാണ് മത്സരം.
ബ്രസീലിലെ മനോസില്‍ നടക്കുന്ന അന്താരാഷ്ട്ര ഫുട്‌ബോള്‍ ടൂര്‍ണമെന്റില്‍ ഇന്ത്യന്‍ വനിതകളും പങ്കെടുക്കും. ചിലി, വെനസ്വേല വനിതാ ടീമുകളും ടൂര്‍ണമെന്റില്‍ ഉണ്ട്.
ബ്രസീല്‍ വനിതാ ഫുട്‌ബോള്‍ ടീം ട്വിറ്ററിലൂടെയാണ് ഇക്കാര്യം അറിയിച്ചത്. നവംബര്‍ 25 മുതല്‍ ഡിസംബര്‍ ഒന്നുവരെയാണ് റൗണ്ട് റോബിന്‍ അടിസ്ഥാനത്തില്‍ നടത്തുന്ന ടൂര്‍ണമെന്റ്. നവംബര്‍ 25നുള്ള ആദ്യ മത്സരത്തില്‍ ഇന്ത്യ ബ്രസീലിനെ നേരിടും. 28ന് ചിലിയെയും ഡിസംബര്‍ ഒന്നിന് വെനസ്വേലയെയും നേരിടും.