ജനങ്ങള്‍ക്കുവേണ്ടി ശക്തമായി പോരാടുമെന്ന ദൃഢനിശ്ചയത്തോടെയാണ് പതിനെട്ടാം ലോക്‌സഭാ സമ്മേളനത്തിന് ഇന്ത്യാ സഖ്യം എത്തുന്നതെന്ന് എഐസിസി ജനറല്‍ സെക്രട്ടറി കെ.സി. വേണുഗോപാല്‍ എംപി. മോദി സര്‍ക്കാരിനെ നിയന്ത്രിക്കാനുള്ള കരുത്തുമായാണ് ഇന്ത്യ സഖ്യം എത്തുന്നത്. നമ്മള്‍ ജനാധിപത്യത്തിന്റെ കാവല്‍ക്കാരാണെന്നും അനീതിക്കെതിരെ ശക്തമായി പോരാടുമെന്നും കെ.സി. വേണുഗോപാല്‍ വ്യക്തമാക്കി. ഭരണഘടന ഉയര്‍ത്തിപ്പിടിച്ചുകൊണ്ടുള്ള പ്രതിഷേധത്തിന്റെ ദൃശ്യങ്ങളും കെ.സി. വേണുഗോപാല്‍ എക്‌സില്‍ പങ്കുവെച്ചു.
”നമ്മള്‍ ജനാധിപത്യത്തിന്റെ കാവല്‍ക്കാരാണ്. ഭരണഘടനയെ സംരക്ഷിക്കാനും ഉയര്‍ത്തിപ്പിടിക്കാനും ഞങ്ങള്‍ പ്രതിജ്ഞാബദ്ധരാണ്. അനീതിക്കെതിരെ പോരാടാനുള്ള ദൃഢനിശ്ചയത്തില്‍ ഞങ്ങള്‍ ഒറ്റക്കെട്ടാണ്. ബാപ്പുവിന്റെ അനുഗ്രഹം വാങ്ങി പാര്‍ലമെന്റില്‍ ജനങ്ങളുടെ പ്രശ്നങ്ങള്‍ക്കും വെല്ലുവിളികള്‍ക്കും പ്രതീക്ഷകള്‍ക്കും അഭിലാഷങ്ങള്‍ക്കും ശബ്ദം നല്‍കാനും ഓരോ മിനിറ്റിലും സര്‍ക്കാരിനെ നിയന്ത്രിക്കാനുമുള്ള പുത്തന്‍ ദൃഢനിശ്ചയത്തോടെയാണ് ഇന്ത്യാ സഖ്യം 18-ാം ലോക്സഭയിലെത്തുന്നത്” – കെ.സി. വേണുഗോപാല്‍ എക്‌സില്‍ കുറിച്ചു.