മുക്കത്ത് പൊലീസ് കസ്റ്റഡിയിലെടുത്ത ജെ.സി.ബി കടത്തിയ സംഭവത്തില്‍ സസ്‌പെഷനിലായ എസ്‌ഐയെ പ്രതി ചേര്‍ത്തേക്കും. സാഹചര്യ തെളിവുകളുടെ അടിസ്ഥാനത്തിലാണ് അന്വേഷണ സംഘത്തിന്റെ നീക്കം. കേസിലെ പ്രതിയുടെയും എസ്.ഐയുടെയും ടവര്‍ ലൊക്കേഷന്‍ പരിശോധിച്ചതില്‍ നിന്ന് പൊലീസിന് നിര്‍ണായക വിവരങ്ങള്‍ ലഭിച്ചതായാണ് സൂചന. മറ്റ് പൊലീസുകാര്‍ക്കും സംഭവത്തില്‍ പങ്കുണ്ടോ എന്നും അന്വേഷിക്കും.
ജെ.സി.ബി കടത്തിയ സംഭവത്തില്‍ കൃത്യവിലോപം ഉണ്ടായതായി കാണിച്ചാണ് എസ്.ഐ നൗഷാദിനെ സസ്‌പെന്‍ഡ് ചെയ്തിരുന്നു.സെപ്റ്റംബര്‍ 19 ന് തോട്ടുമുക്കത്ത് ജെസിബി ഇടിച്ച് ബൈക്ക് യാത്രികന്‍ മരിച്ച സംഭവത്തില്‍ തൊണ്ടി മുതല്‍ മാറ്റി, തെളിവ് നശിപ്പിക്കാന്‍ എസ്എ നൗഷാദ് കൂട്ടു നിന്നുവെന്നാണ് കണ്ടെത്തല്‍.
അപകട മരണ കേസില്‍ പൊലീസ് പിടിച്ചെടുത്ത ജെസിബിയുടെ നമ്പര്‍ ഉള്‍പ്പെടെയുള്ള വിശദമായ വിവരങ്ങള്‍ എഫ്‌ഐആറില്‍ രേഖപ്പെടുത്തിയില്ലെന്നും കണ്ടെത്തിയിട്ടുണ്ട്. പ്രതികള്‍ക്ക് രക്ഷപ്പെടാന്‍ എസ്‌ഐ കൂട്ടു നിന്നെന്നും, തൊണ്ടി മുതല്‍ മാറ്റി പകരം ജെ.സി.ബി പൊലീസ് സ്‌റ്റേഷനില്‍ നിര്‍ത്താന്‍ നൗഷാദ് സഹായം ചെയ്തുവെന്നും പ്രാഥമിക അന്വേഷണ റിപ്പോര്‍ട്ടിലുണ്ട്.
താമരശ്ശേരി ഡിവൈഎസ്പി നടത്തിയ അന്വേഷണത്തില്‍ എസ്‌ഐയുടെ പങ്ക് വ്യക്തമായതോടെ റിപ്പോര്‍ട്ട് കോഴിക്കോട് റൂറല്‍ എസ്പിയ്ക്ക് കൈമാറി. എസ്പിയുടെ റിപ്പോര്‍ട്ട് ലഭിച്ചതോടെയാണ് എസ്‌ഐയെ അന്വേഷണ വിധേയമായി സസ്‌പെന്റ് ചെയ്ത് കൊണ്ടുള്ള ഉത്തരമേഖല ഐജിയുടെ നടപടി. സംഭവ ദിവസം ഡ്യൂട്ടിയില്‍ ഉണ്ടായിരുന്ന മറ്റ് പൊലീസുകാരും കൃത്യവിലോപത്തിന് കൂട്ടു നിന്നതായി കണ്ടെത്തിയിട്ടുണ്ട്.
വിശദമായ അന്വേഷണ റിപ്പോര്‍ട്ട് ലഭിക്കുന്നതോടെ മറ്റുള്ളവര്‍ക്കെതിരെയും നടപടി ഉണ്ടായേക്കും. ജെസിബി മാറ്റി തെളിവ് നശിപ്പിക്കാന്‍ ശ്രമിച്ച കേസില്‍ ക്വാറി ഉടമയുടെ മകന്‍ ഉള്‍പ്പെടെ 6 പ്രതികളെ നേരത്തെ അറസ്റ്റ് ചെയ്തിരുന്നു. കസ്റ്റഡിയിലുള്ള പ്രതികളുമായി അന്വേഷണ സംഘം തെളിവെടുപ്പ് നടത്തി. പ്രതികള്‍ ഗൂഢാലോചന നടത്തിയ സ്ഥലങ്ങള്‍, പകരം ജെസിബി നിര്‍ത്തിയിട്ടിരുന്ന മുക്കം ഹൈസ്‌കൂള്‍ റോഡ് എന്നിവിടങ്ങളിലായിരുന്നു തെളിവെടുപ്പ്.