തിരുവനന്തപുരം: നാവായിക്കുളത്ത് യുവതിയെ കടയ്ക്കുള്ളിലാക്കി തീയിട്ടു. ഗുരുതരമായി പരിക്കേറ്റ ജാസ്മി (39)യെ ആശുപത്രിയില്‍ പ്രവേശിപ്പിച്ചു. യുവതിയുടെ അമ്മാവനായ മുഹമ്മദ് ഇസ്മയിലാണ് കടയ്ക്ക് തീയിട്ടത്. തീയിട്ട ശേഷം ഇയാള്‍ വിഷം കഴിച്ച് ആത്മഹത്യക്ക് ശ്രമിച്ചു. ഇസ്മയിലിനെയും ആശുപത്രിയില്‍ പ്രവേശിപ്പിച്ചു.
ജാസ്മിന്റെ മാതാവും മാതൃസഹോദരനും തമ്മിലുള്ള വഴിത്തര്‍ക്കമാണ് ആക്രമണത്തിന് കാരണമായത്. നേരത്തെയും ഇവര്‍ തമ്മില്‍ വഴിത്തര്‍ക്കം ഉണ്ടായിരുന്നതായും ഇത് സംബന്ധിച്ച് കോടതിയില്‍ കേസ് നടക്കുകയാണെന്നും സമീപവാസികള്‍ പറഞ്ഞു. ഇന്ന് കേസുമായി ബന്ധപ്പെട്ട് കോടതിയില്‍ പോയി വന്നതിന് പിന്നാലെയാണ് സംഭവം.
ജാസ്മിന്റെ മാതാവ് നടത്തുന്നതാണ് കട. ഉച്ചയ്ക്ക് ശേഷം പെട്രോളുമായി എത്തിയ ഇസ്മയില്‍ കടയിലേക്ക് പെട്രോള്‍ ഒഴിച്ച് തീ കൊളുത്തുകയായിരുന്നു. ആ സമയത്ത് ജാസ്മിന്‍ കടയ്ക്ക് അകത്ത് കുടുങ്ങുകയും ചെയ്തു. ഷട്ടര്‍ തുറന്ന് നാട്ടുകാരാണ് യുവതിയെ ആശുപത്രിയിലെത്തിച്ചത്.