കര്‍ണാടകയില്‍ ലോക്‌സഭ തെരഞ്ഞെടുപ്പുമായി ബന്ധപ്പെട്ട് പുറത്തിറക്കിയ ബി.ജെ.പി സ്ഥാനാര്‍ഥിയുടെ പോസ്റ്ററില്‍ കേരളത്തിലെ ജെ.ഡി.എസ് നേതാക്കളുടെ ചിത്രം. വൈദ്യുതി വകുപ്പ് മന്ത്രി കെ. കൃഷ്ണന്‍കുട്ടിയുടേയും പാര്‍ട്ടി കേരള അധ്യക്ഷനും മുന്‍ മന്ത്രിയുമായ മാത്യു ടി. തോമസ് എം.എല്‍.എയുടെയും ചിത്രമാണ് പോസ്റ്ററിലുള്ളത്. ഇരുവരും നിലവില്‍ ജെ.ഡി.എസ് ദേശീയ നിര്‍വാഹക സമിതി അംഗങ്ങളാണ്.
ബംഗളൂരു റൂറല്‍ മണ്ഡലം സ്ഥാനാര്‍ഥിയും ദേവഗൗഡയുടെ മരുമകനുമായ ഡോ. സി.എന്‍. മഞ്ജുനാഥിന് വോട്ടഭ്യര്‍ഥിക്കുന്ന പോസ്റ്ററിലാണ് ജെ.ഡി.എസ് ദേശീയ അധ്യക്ഷന്‍ എച്ച്.ഡി. ദേവഗൗഡക്കും പ്രധാനമന്ത്രി നരേന്ദ്ര മോദിക്കും ഒപ്പം കേരളത്തിലെ ജെ.ഡി.എസ് നേതാക്കളുടെ ചിത്രവും ഇടം പിടിച്ചത്. എന്നാല്‍ പോസ്റ്ററിനെ കുറിച്ച് ജെ.ഡി.എസ് കേരള ഘടകം പ്രതികരിച്ചിട്ടില്ല.
ദേശീയ തലത്തില്‍ എന്‍ഡിഎ സഖ്യത്തിലുള്ള ജെ.ഡി.എസ് കേരളത്തില്‍ എല്‍ഡിഎഫ് സഖ്യത്തിനൊപ്പമാണ്. 2023 ലെ കര്‍ണാടക നിയമസഭാ തെരഞ്ഞെടുപ്പിന് പിന്നാലെയാണ് എന്‍ഡിഎയുമായി സഖ്യംചേരാന്‍ ദേവഗൗഡ തീരുമാനിച്ചത്.
ഈ തീരുമാനത്തില്‍ അതൃപ്തിയറിയിച്ച കേരള ഘടകം പ്രതിഷേധത്തിന്റെ ഭാഗമായി ദേശീയ കമ്മിറ്റിയില്‍നിന്ന് മാറി നിന്നിരുന്നു. പിന്നാലെ ജെ.ഡി.എസ് ദേശീയ നേതൃത്വവുമായുള്ള എല്ലാ ബന്ധങ്ങളും അവസാനിപ്പിച്ച് കേരള ഘടകം സ്വതന്ത്രമായി നില്‍ക്കാന്‍ തീരുമാനിക്കുകയായിരുന്നു.