എസ്.എഫ്.ഐ മുന്‍ നേതാവ് പ്രതിയായ കേസില്‍ കഞ്ചാവ് കടത്തിയത് സ്ത്രീയേയും കുട്ടികളെ ഉപയോഗിച്ചെന്ന് എക്‌സൈസിന്റെ കണ്ടെത്തല്‍. പ്രതികളിലൊരാളിന്റെ ഭാര്യയേയും മൂന്ന് കുട്ടികളേയുമാണ് കടത്തിനുപയോഗിച്ചത്. കഴിഞ്ഞ ദിവസമാണ് ഒഡീഷയില്‍ നിന്ന് തലസ്ഥാനത്തെത്തിച്ച 94 കിലോ കഞ്ചാവുമായി എസ്.എഫ്.ഐ മുന്‍ നേതാവ് അഖിലടക്കം നാല് പേര്‍ എക്‌സൈസിന്റെ പിടിയിലായത്.
പൊലീസിന്റെയും എക്‌സൈസിന്റെയും കണ്ണു വെട്ടിക്കുന്നതിനാണ് കുട്ടികളെ മറയാക്കുന്നത്. ഒഡീഷയില്‍ നിന്നും തലസ്ഥാനത്തേക്കുള്ള യാത്രയില്‍ കുട്ടികള്‍ ഇരുന്ന ഭാഗത്താണ് കഞ്ചാവ് ഒളിപ്പിച്ചിരുന്നത്. സംസ്ഥാനാതിര്‍ത്തിയിലെത്തിച്ച ശേഷം ഇവരെ ഇറക്കി മറ്റൊരു വാഹനത്തില്‍ കയറ്റി വിടുകയായിരുന്നു. പ്രതിയുടെ ഭാര്യയേയും കുട്ടികളേയുമല്ലാതെ, മറ്റു സ്ത്രീകളെയും കുട്ടികളെയും കടത്തിനുപയോഗിച്ചോയെന്നും എക്‌സൈസ് പരിശോധിക്കുന്നുണ്ട്. പ്രതികള്‍ക്കെതിരെ ജുവനൈല്‍ ജസ്റ്റിസ് ആക്ട് പ്രകാരവും കേസെടുക്കും.
സ്ത്രീയ്ക്കും കുട്ടികള്‍ക്കുമായി തിരച്ചില്‍ ഊര്‍ജിതമാക്കിയിട്ടുണ്ട്. പ്രതികള്‍ പിടിയിലായ അന്ന് തന്നെ ഇവര്‍ മുങ്ങുകയായിരുന്നു. ഒഡീഷയിലെ ഗോപാല്‍പൂരില്‍ നിന്നാണ് ഇവര്‍ കഞ്ചാവ് തലസ്ഥാനത്തെത്തിച്ചത്. സ്ത്രീയേയും കുട്ടികളേയും ഗോപാല്‍പൂരില്‍ നിന്നും ഇവര്‍ കഞ്ചാവ് വാങ്ങാനായി പോയി. പിന്നീട് ഇവരെയും ഒപ്പം കൂട്ടി നാട്ടിലേക്ക് മടങ്ങി. മുന്‍ എസ്.എഫ്.ഐ നേതാവായ അഖില്‍, വിഷ്ണു, രതീഷ് എന്നിവരാണ് എക്‌സൈസിന്റെ പിടിയിലായത്.