ജെയ്പൂര്‍: രാജസ്ഥാനിലെ ബുണ്ടി ജില്ലയില്‍ ദളിത് യുവാവിനെ 36 മണിക്കൂര്‍ തൊഴുത്തില്‍ കെട്ടിയിട്ട് ഭക്ഷണവും വെള്ളവും നല്‍കാതെ പീഡിപ്പിച്ചതായി റിപ്പോര്‍ട്ട്. സംഭവത്തില്‍ പൊലീസ് കേസെടുത്തു.
35കാരനായ രാധേശ്യാം മേഘ്‌വാള്‍ ആണ് പീഡനത്തിന് ഇരയായത്. കൂലിത്തൊഴിലാളിയായ മേഘ്‌വാള്‍ പരംജിത് എന്നയാളുടെ വീട്ടില്‍ ജോലിക്കു ചെല്ലാമെന്ന് ഉറപ്പു നല്‍കിയിരുന്നതായും ഇത് പാലിച്ചില്ലെന്ന് ആരോപിച്ചായിരുന്നു പീഡനമെന്നുമാണ് റിപ്പോര്‍ട്ട്. പരംജിതിന്റെ വീട്ടിലെ തൊഴുത്തിലാണ് മേഘ് വാളിനെ 36 മണിക്കൂര്‍ ചങ്ങലില്‍ ബന്ധിച്ച് പട്ടിണിക്കിട്ടത്. അജ്ഞാതര്‍ വിവരം അറിയിച്ചതിനെതുടര്‍ന്ന് പൊലീസ് എത്തിയാണ് ഇയാളെ മോചിപ്പിച്ചത്.
ആശുപത്രിയിലെത്തിച്ച് പ്രാഥമിക ചികിത്സ നല്‍കിയ ശേഷം വിട്ടയച്ചു. സംഭവത്തില്‍ പരംജിത് സിങിനെ ഒന്നാം പ്രതിയാക്കി കേസ് രജിസ്റ്റര്‍ ചെയ്തതായി ഡപ്യൂട്ടി പൊലീസ് കമ്മീഷണര്‍ ശങ്കര്‍ലാല്‍ മീണ പറഞ്ഞു.