കോഴിക്കോട് ഫറോക്ക് റെയില്‍വേ സ്റ്റേഷനില്‍ ട്രെയിന്‍ തടഞ്ഞ ബീഹാര്‍ സ്വദേശിയായ യുവാവ് അറസ്റ്റില്‍. ബീഹാര്‍ സ്വദേശി മന്ദീപ് ഭാരതിയാണ് പിടിയിലായത്.രാവിലെ 9 മണിയോടെ മംഗളൂരു-നാഗര്‍കോവില്‍ പരശുറാം എക്‌സ്പ്രസ് ഒന്നാം പ്ലാറ്റ്‌ഫോമില്‍ എത്തിയപ്പോഴാണ് സംഭവം.
കയ്യില്‍ ഉണ്ടായിരുന്ന വടിയില്‍ കാവിക്കൊടി കെട്ടി ട്രാക്കില്‍ ഇറങ്ങിയ ഇയാള്‍ ട്രെയിനിനു മുന്‍പില്‍ നില്‍ക്കുകയായിരുന്നു. ലോക്കോ പൈലറ്റ് വിവരമറിയിച്ചതിനെ തുടര്‍ന്ന് ആര്‍പിഎഫ് ഇയാളെ പിടികൂടി.
കുറ്റിപ്പുറത്ത് കൂലിപ്പണിക്കാരനായ തനിക്ക് 16,500 രൂപ ലഭ്യമാകാന്‍ ഉണ്ടെന്നും ഇതിനാലാണ് ട്രെയിന്‍ തടഞ്ഞതെന്നുമാണ് ഇയാള്‍ പറയുന്നത്. അതേസമയം പ്രതിയുടെ മൊഴിയില്‍ അവ്യക്തതയുണ്ടെന്ന് പൊലീസ് പറയുന്നു.