ലക്‌നൗ: കോച്ചിങ് സെന്ററിലെ അധ്യാപകനെ ക്ലാസില്‍നിന്ന് വിളിച്ചിറക്കി കാലില്‍ വെടിവെച്ച് കൗമാരക്കാരായ രണ്ടു വിദ്യാര്‍ഥികള്‍. ഇതിന്റെ ദൃശ്യങ്ങള്‍ ഇവര്‍ തന്നെ പകര്‍ത്തി പ്രചരിപ്പിക്കുകയും ചെയ്തു. ഉത്തര്‍പ്രദേശിലെ ആഗ്രയിലാണ് ഞെട്ടിക്കുന്ന സംഭവം നടന്നത്. ഇടതുകാലില്‍ പരിക്കേറ്റ സുമിത് സിങ് എന്ന അധ്യാപകന്‍ ആശുപത്രിയില്‍ ചികിത്സയിലാണ്.
മൊത്തം 40 ബുള്ളറ്റുകള്‍ അധ്യാപകനുനേരെ ഉപയോഗിക്കുമെന്നും അടുത്ത ആറുമാസത്തിനുള്ളില്‍ 39 തവണകൂടി വെടിവെക്കുമെന്നും വിദ്യാര്‍ഥികള്‍ വീഡിയോയില്‍ ഭീഷണി മുഴക്കുന്നുണ്ട്. വെടിവെച്ച ശേഷം ബൈക്കില്‍ കയറി രക്ഷപ്പെടുന്നതും 25 സെക്കന്റ് ദൈര്‍ഘ്യമുള്ള ദൃശ്യങ്ങളില്‍ കാണാം. ഇവര്‍ സ്വയം ഗുണ്ടകള്‍ എന്ന് വിശേഷിപ്പിക്കുന്നതും ദൃശ്യങ്ങളിലുണ്ട്. വ്യാഴാഴ്ച നടന്ന സംഭവത്തില്‍ രണ്ട് ആണ്‍കുട്ടികളെ പൊലീസ് പിന്നീട് അറസ്റ്റ് ചെയ്തു. സുമിത്തിന്റെ കോച്ചിങ് ക്ലാസിലെ വിദ്യാര്‍ഥികളാണ് ഇവര്‍. അധ്യാപകന്റെ സഹോദരനുമായുള്ള തര്‍ക്കമാണ് ആക്രമണത്തിനു പിന്നിലെന്നാണ് സൂചന.