തക്കാളിയടക്കമുള്ള പച്ചക്കറികളുടെ വില വര്‍ധനവ് കുടുംബ ബജറ്റിനെ സാരമായി ബാധിക്കുന്നതിനിടയില്‍ ഉത്തര്‍പ്രദേശ് മന്ത്രി പ്രതിഭ ശുക്ലയുടെ പരാമര്‍ശം വിവാദമാകുന്നു. തക്കാളിക്ക് വില കൂടുതലാണെങ്കില്‍ ആളുകള്‍ തക്കാളി കഴിക്കുന്നത് നിര്‍ത്തുകയോ അല്ലെങ്കില്‍ സ്വന്തമായി വീട്ടില്‍ വളര്‍ത്തിയെടുക്കുകയോ വേണമെന്നാണ് മന്ത്രിയുടെ നിര്‍ദേശം.
തക്കാളി കഴിക്കുന്നത് നിര്‍ത്തിയാല്‍ വിലയും തനിയേ കുറഞ്ഞോളും. അതല്ലെങ്കില്‍, തക്കാളിക്ക് പകരം നാരങ്ങ കഴിക്കാം. ആരും തക്കാളി കഴിക്കാതായാല്‍ വിലയും കുറയും. എന്നായിരുന്നു മന്ത്രിയുടെ പരാമര്‍ശം. വിലക്കയറ്റത്തിന് പരിഹാര മാര്‍ഗം എന്ന് പറഞ്ഞാണ് എല്ലാവരും വീട്ടില്‍ തക്കാളിയുണ്ടാക്കാന്‍ മന്ത്രി നിര്‍ദേശിച്ചത്. അസാഹി ഗ്രാമത്തിലെ പോഷകാഹാര ഉദ്യാനത്തെ ചൂണ്ടിക്കാണിച്ചായിരുന്നു മന്ത്രിയുടെ ഉപദേശം.
അസാഹി ഗ്രാമത്തില്‍ പോഷകാഹാര ഉദ്യാനം ഉണ്ടാക്കിയിട്ടുണ്ട്. ഗ്രാമത്തിലെ സ്ത്രീകളാണ് പോഷകാഹാരത്തോട്ടം ഉണ്ടാക്കിയത്. അവിടെ തക്കാളിയുമുണ്ട്. എല്ലായ്‌പ്പോഴും തക്കാളിക്ക് വിലക്കൂടുതലാണ്. തക്കാളിയുടെ വിലക്കയറ്റം തടയാന്‍ ഒരു വഴിയുണ്ട്. നിങ്ങള്‍ തക്കാളി കഴിക്കുന്നില്ലെങ്കില്‍ നാരങ്ങ ഉപയോഗിക്കുക, വില കൂടുതലുള്ളത് ഉപേക്ഷിക്കുക, അപ്പോള്‍ തനിയേ വില കുറഞ്ഞോളും.
മന്ത്രിയുടെ ഉപദേശം അസ്ഥാനത്തായിപ്പോയെന്നും ജനങ്ങളുടെ പ്രശ്‌നങ്ങളെ മനസ്സിലാക്കാതെയുള്ളതാണെന്നുമാണ് വിമര്‍ശനം. നേരത്തേ, നിര്‍മല സീതാരാമന്‍ ആളുകളോട് ഉള്ളി കഴിക്കുന്നത് നിര്‍ത്താന്‍ പറഞ്ഞു, ഇപ്പോള്‍ പ്രതിഭ തക്കാളി കഴിക്കുന്നതും നിര്‍ത്താന്‍ ആവശ്യപ്പെട്ടിരിക്കുകയാണെന്ന് സ്ഥലത്തെ കച്ചവടക്കാരനായ രവീന്ദ്ര ഗുപ്ത വിമര്‍ശിച്ചു.