ചളിയും തമാശയുമല്ല, കാര്യമാണു പറയുന്നതെന്ന് പറഞ്ഞ് സെക്രട്ടേറിയേറ്റ് പടിക്കല്‍ സമരം ചെയ്യുന്ന ശ്രീജിത്തിന് പിന്തുണയുമായി സാമൂഹ്യമാധ്യമങ്ങളിലെ ട്രോള്‍ ഗ്രൂപ്പ് ഐ.സി.യു(ഇന്റര്‍നാഷ്ണല്‍ ചളി യൂണിയന്‍) രംഗത്ത്. തന്റെ സഹോദരനെ ലോക്കപ്പില്‍ മര്‍ദ്ദിച്ച് കൊന്നതില്‍ കുറ്റക്കാരെന്നു കണ്ടെത്തിയ പോലീസുകാര്‍ക്കെതിരെ നടപടിക്കായി സെക്രട്ടേറിയേറ്റിനു മുന്‍പില്‍ സത്യാഗ്രഹമിരിക്കുന്ന നെയ്യാറ്റിങ്കര സ്വദേശി ശ്രീജിത്തിന് പിന്തുണ നല്‍കുകയാണ് ഐ.സി.യു. 762 ദിവസമായിട്ടും ശ്രീജിത്തിന് നീതി ലഭ്യമായിട്ടില്ല. ശ്രീജിത്തിന് നീതിക്കുവേണ്ടി നമുക്കോരോരുത്തര്‍ക്കും ജനപ്രതിനിധികളോട് സംസാരിക്കാമെന്നും ഐ.സി.യു കുറിപ്പില്‍ പറയുന്നു. നീതിക്കുവേണ്ടി ഹാഷ്ടാഗ് ഉള്‍പ്പെടെയുള്ള ക്യാംപെയ്ന്‍ സംഘടിപ്പിക്കണമെന്നും ഐ.സി.യു ആവശ്യപ്പെടുന്നുണ്ട്.
പോസ്റ്റിന്റെ പൂര്‍ണ്ണരൂപം:
ചളിയല്ല, തമാശയല്ല, കാര്യമാണു പറയുന്നത്.
Justice delayed is justice denied. നീതി വൈകുന്നത് നീതി നിഷേധമാണു.
തന്റെ സഹോദരനെ ലോക്കപ്പില്‍ മര്‍ദ്ദിച്ച് കൊന്നതില്‍ കുറ്റക്കാരെന്നു കണ്ടെത്തിയ പോലീസുകാര്‍ക്കെതിരെ നടപടിക്കായി സെക്രട്ടേറിയേറ്റിനു മുന്‍പില്‍ സത്യാഗ്രഹമിരിക്കുന്ന നെയ്യാറ്റിങ്കര സ്വദേശി ശ്രീജിത്തിന് 762 ആമത് ദിവസവും നീതി ലഭ്യമായിട്ടില്ല. കുറ്റാരോപിതര്‍ക്കെതിരെയല്ല നടപടി വൈകുന്നത് മറിച്ച് പോലീസ് കമ്പ്‌ലൈന്റ് അതോറിറ്റി കുറ്റക്കാരെന്നു കണ്ടെത്തുകയും തുടരന്വേഷണത്തിനു ഉത്തരവിടുകയും ചെയ്തവര്‍ക്കെതിരെയുള്ള നടപടികളാണു മെല്ലെപ്പോക്കിനിരയാകുന്നതും ഒരു ചെറുപ്പക്കാരന്റെ കൂടെ ജീവിതം കവരുന്ന അവസ്ഥയുടെ അടുത്തേക്കെത്തിക്കുന്നതും.
അധികാരമുള്ളവര്‍ ആരെങ്കിലും ശ്രീജിത്തിനു വേണ്ടി സംസാരിച്ചിരുന്നു എങ്കില്‍ ഒരു പക്ഷെ രണ്ട് വര്‍ഷത്തില്‍ അധികം ഈ യുവാവിനു തെരുവില്‍ കിടക്കേണ്ടി വരില്ലായിരുന്നു.
A hash tag or an online campaign might not bring justice but it would bring the attention the issue deserves. ശ്രീജിത്തിനു വേണ്ടി സംസാരിക്കാന്‍ നമുക്കോരോരുത്തര്‍ക്കും നമ്മുടെ ജനപ്രതിനിധികളോട് ആവശ്യപ്പെടാം. ആ രക്തം നമ്മുടെ കൈകളിലാണു.