യമനിലെ സന്‍അ ജയിലില്‍ വധശിക്ഷ കാത്തു കഴിയുന്ന പാലക്കാട് കൊല്ലങ്കോട് സ്വദേശിനി നിമിഷ പ്രിയയുടെ മോചനത്തിന് സഹായം തേടി കുടുംബം പാണക്കാട്ടെത്തി. ഇന്നലെ രാവിലെ ഒമ്പത് മണിയോടെയാണ് നിമിഷയുടെ അമ്മ പ്രേമകുമാരിയും മകള്‍ മിഷേലും പാണക്കാടെത്തി സയ്യിദ് സാദിഖലി ശിഹാബ് തങ്ങളെയും സയ്യിദ് മുനവ്വറലി തങ്ങളെയും പി.കെ കുഞ്ഞാലിക്കുട്ടി എം.എല്‍.എയേയും കണ്ടത്.
മരണപ്പെട്ടയാളുടെ കുടുംബത്തിന് ബ്ലഡ് മണി നല്‍കി നിമിഷയുടെ മോചനം സാധ്യമാക്കാനുള്ള ശ്രമങ്ങളാണ് സേവ് നിമിഷ പ്രിയ ആക്ഷന്‍ കമ്മിറ്റി നടത്തുന്നത്. ഇതിന് ഭീമമായ തുകവേണം. കുടുംബത്തിനോ ആക്ഷന്‍ കമ്മിറ്റിക്കോ താങ്ങാന്‍ കഴിയാത്തതാണിത്. ഈ സാഹചര്യത്തിലാണ് കുടുംബം പാണക്കാട്ടെത്തി മുസ്‌ലിംലീഗ് പ്രസ്ഥാനത്തിന്റെയും നേതാക്കളുടേയും സഹായം തേടിയത്.
നിമിഷ ജയിലിലായതോടെ കേസിനും മറ്റുമായി വീടുള്‍പ്പെടെയുള്ള സമ്പാദ്യം വില്‍ക്കേണ്ടി വന്നു. വാര്‍ത്ത കേട്ടതു മുതല്‍ ഭര്‍ത്താവ് മാനസികമായി തകര്‍ന്ന നിലയിലാണ്. ഏക മകളുടെയും അവസ്ഥ സമാനമാണ്. സര്‍ക്കാര്‍ സഹായത്തിനായും നിയമ സഹായത്തിനായും മുസ്‌ലിംലീഗ് ഇടപെടല്‍ വേണമെന്ന് നേതക്കള്‍ക്ക് നല്‍കിയ നിവേദനത്തില്‍ കുടുംബം ആവശ്യപ്പെട്ടു.
യമനി യുവാവിന്റെ മരണവുമായി ബന്ധപ്പെട്ട കേസിലാണ് നിമിഷ ശിക്ഷ അനുഭവിക്കുന്നത്. തൊഴിലിടത്തില്‍ നേരിട്ട ക്രൂരമായ ശാരീരിക, മാനസിക പീഡനങ്ങളില്‍ നിന്ന് രക്ഷപ്പെടാന്‍ നടത്തിയ ശ്രമമാണ് നിമിഷയെ തീരാനഷ്ടത്തിലാക്കിയത്. പിടിച്ചുവെച്ച പാസ്‌പോര്‍ട്ട് കൈവശപ്പെടുത്താനായി യുവാവിന് അനസ്‌ത്തേഷ്യ കുത്തിവെച്ചത് മരണ കാരണമാവുകയായിരുന്നു. രക്ഷപ്പെടാന്‍ ശ്രമിക്കുന്നതിനിടെ യമന്‍ അതിര്‍ത്തിയില്‍ നിന്നാണ് നിമിഷ പിടിയിലായത്. യുവാവിന്റെ മൃതശരീരം പല തുണ്ടുകളായി പിന്നീട് കണ്ടെടുക്കപ്പെട്ടിരുന്നു. ഈ കുറ്റകൃത്യം താന്‍ ചെയ്തിട്ടില്ലെന്നും തന്റെമേല്‍ അടിച്ചേല്‍പ്പിക്കപ്പെട്ടതാണെന്നുമാണ് നിമിഷ പറയുന്നത്. സഹായം തേടി നേരത്തെ കുടുംബം ഭരണ, പ്രതിപക്ഷ നേതാക്കളെ കണ്ടിരുന്നു. ഇതിന്റെ തുടര്‍ച്ചയായാണ് യെമനില്‍ ഏറെ ബന്ധങ്ങളുള്ള മുസ്‌ലിംലീഗ് നേതാക്കള്‍ക്കരികെ ആക്ഷന്‍ കമ്മിറ്റി കണ്‍വീനര്‍ ജയചന്ദ്രന്‍ അടക്കമുള്ളവര്‍ക്കൊപ്പം കുടുംബം എത്തിയത്. വിഷയത്തില്‍ എംബസിയുമായും സര്‍ക്കാരുമായും സംസാരിക്കാമെന്ന് തങ്ങള്‍ കുടുംബത്തിന് ഉറപ്പുനല്‍കി.