ന്യൂഡല്‍ഹി: ഐ ലീഗ് ഫുട്‌ബോളിന്റെ മത്സര ക്രമം പുറത്തിറക്കി. ഒക്ടോബര്‍ 28ന് ആകും ഐ ലീഗ് ആരംഭിക്കുക. ലീഗിലെ ആദ്യ മത്സരത്തില്‍ റിയല്‍ കാശ്മീര്‍ എഫ്.സി രാജസ്ഥാന്‍ യുണൈറ്റഡിനെ നേരിടും. അന്ന് തന്നെ കോഴിക്കോട് ഇ.എം.എസ് സ്‌റ്റേഡിയത്തില്‍ നടക്കുന്ന മത്സരത്തില്‍ ഗോകുലം കേരള ഐ ലീഗിലെ പുതിയ ക്ലബ്ബായ ഇന്റര്‍ കാശിയെയും നേരിടും.
13 ടീമുകള്‍ ആണ് ഇത്തവണ ലീഗില്‍ ഉള്ളത്. ഇന്റര്‍ കാശി, ഡല്‍ഹി എഫ്.സി, നാംദാരി എന്നീ മൂന്ന് ക്ലബുകള്‍ പുതുതായി ഐ ലീഗില്‍ എത്തിയിട്ടുണ്ട്. ഗോകുലം കേരള, ചര്‍ച്ചില്‍ ബ്രദേഴ്‌സ്, മുഹമ്മദന്‍സ്, ഐസ്വാള്‍, നെരോക, രാജസ്ഥാന്‍ യുണൈറ്റഡ്, റിയല്‍ കാശ്മീര്‍, ഷില്ലോങ് ലജോങ്, ശ്രീനിധി ഡെക്കാന്‍, ട്രാവു എന്നീ ക്ലബുകളും ലീഗില്‍ മാറ്റുരക്കുന്നുണ്ട്.