മൂന്നാറില്‍ മലമുകളില്‍ നിന്നു കൂറ്റന്‍ പാറ അടര്‍ന്നു വീണ് ഓടിക്കൊണ്ടിരിക്കുന്ന കാര്‍ തകര്‍ന്നു. മൂന്നാര്‍ പെരിയവരക്ക് സമീപമാണ് അപകടമുണ്ടായത്. ഡ്രൈവര്‍ക്ക് ഗുരുതരപരിക്ക്. അന്തര്‍ സംസ്ഥാനപാതയിലൂടെ വാഹനം ഓടിച്ചു വന്ന സൂര്യനെല്ലി സ്വദേശി അന്തോണി രാജിനാണ് (38)അപകടത്തില്‍ പരിക്കേറ്റത് ടാറ്റ ഹൈറേഞ്ച് ആശുപത്രിയില്‍ പ്രവേശിപ്പിച്ചു.
ചിന്നക്കനാലില്‍ നിന്നുള്ള വിനോദസഞ്ചാരികളെ രാജമല സന്ദര്‍ശനത്തിനായി ഇറക്കിയ ശേഷം ഭക്ഷണം കഴിക്കാനായി മൂന്നാറിലേക്കു കാറോടിച്ച് വരികയായിരുന്നു ആന്റണി രാജ്. മുതുവാന്‍പാറ മലയുടെ മുകളില്‍ നിന്നാണ് പാറ താഴേക്കു വീണത്. വീഴ്ചയില്‍ പൂര്‍ണമായി തകര്‍ന്ന കാറിനുള്ളില്‍ അകപ്പെട്ട ആന്റണിയെ വഴിയരികില്‍ കച്ചവടം നടത്തുന്നയാളും വഴിയാത്രക്കാരും ചേര്‍ന്നാണ് കാര്‍ പൊളിച്ച് പുറത്തെടുത്തത്.