ബിസിനസുകാരനെ ഹണിട്രാപ്പിൽ കുടുക്കി പണംതട്ടുകയും കൂടുതൽ പണം ആവശ്യപ്പെട്ട് ഭീഷണിപ്പെടുത്തുകയും ചെയ്തെന്ന കേസിൽ യുവതിയെയും യുവാവിനെയും തിരൂരങ്ങാടി പൊലീസ്‌ പിടികൂടി. മാനന്തവാടി സ്വദേശിയും കോട്ടക്കലിൽ താമസക്കാരിയുമായ യുവതിയെയും ആൺസുഹൃത്തിനെയുമാണ് പൊലീസ്‌ തന്ത്രപരമായി പിടികൂടിയത്.
കഴിഞ്ഞമാസമാണ് പെരുവള്ളൂർ സ്വദേശിയായ ബിസിനസുകാരനെ ഹണിട്രാപ്പിൽക്കുടുക്കി ഭീഷണിപ്പെടുത്തിയത്. 50,000 രൂപ യുവതി കൈക്കലാക്കുകയും ചെയ്തിരുന്നു. 15 ലക്ഷം രൂപ ആവശ്യപ്പെട്ട് ഭീഷണി തുടർന്നതോടെയാണ് ബിസിനസുകാരൻ ജില്ലാ പൊലീസ്‌ മേധാവിക്ക് പരാതി നൽകിയത്.
കേസ് അന്വേഷിച്ച തിരൂരങ്ങാടി പോലീസ് ബാക്കി തുകയുടെ ചെക്ക് നൽകാമെന്ന് പറഞ്ഞ് യുവതിയെ വിളിച്ചുവരുത്തി പിടികൂടുകയായിരുന്നു. വിശദമായ ചോദ്യംചെയ്യലിനുശേഷം ഇവരുടെ അറസ്റ്റ് രേഖപ്പെടുത്തുമെന്ന് തിരൂരങ്ങാടി എസ്.എച്ച്.ഒ. കെ.ടി. ശ്രീനിവാസൻ പറഞ്ഞു.