അന്തിമ ഉത്തരവ് പുറപ്പെടുവിക്കുന്നത് വരെ കര്‍ണാടകയില്‍ ഹിജാബ് നിരോധനം തുടരുമെന്ന കര്‍ണാടക ഹൈക്കോടതിയുടെ
ഇടക്കാല ഉത്തരവിനെതിരായ ഹരജി അടിയന്തരമായി പരിഗണിക്കില്ലെന്ന് സുപ്രീം കോടതി. കര്‍ണാടകത്തിലെ ഹിജാബ് വിഷയം ദേശീയ തലത്തിലേക്ക് വ്യാപിക്കരുതെന്നും ഉചിതമായ സമയത്ത് കോടതിയുടെ ഇടപെടല്‍ ഉണ്ടാകുമെന്നും കേസ് പരിഗണിച്ച ചീഫ് ജസ്റ്റിസ് എന്‍ വി രമണ ആവശ്യപ്പെട്ടു. കര്‍ണാടകത്തില്‍ നടക്കുന്ന കാര്യങ്ങള്‍ തങ്ങള്‍ വീക്ഷിക്കുന്നുണ്ടെന്നും എന്നാല്‍ ഹൈക്കോടതിയാണ് ആദ്യം തീരുമാനം എടുക്കേണ്ടതെന്നും രമണ പറഞ്ഞു. കോടതിക്ക് എല്ലാവരുടെയും ഭരണഘടനാപരമായ അവകാശങ്ങള്‍ സംരക്ഷിക്കാന്‍ ബാധ്യതയുണ്ടെന്നും വ്യക്തമാക്കി.
അന്തിമ ഉത്തരവ് പുറപ്പെടുവിക്കുന്നത് വരെ കര്‍ണാടകയില്‍ ഹിജാബ് നിരോധനം തുടരുമെന്ന് ഇന്നലെ കര്‍ണാടക ഹൈക്കോടതി നിര്‍ദേശിച്ചിരുന്നു. അതുവരെ വിദ്യാര്‍ഥികള്‍ മതപരമായ വസ്ത്രങ്ങള്‍ ധരിക്കരുതെന്നാണ് ഹൈക്കോടതി വ്യക്തമാക്കിയത്.
ഇതിനെ ചോദ്യംചെയ്താണ് സുപ്രീംകോടതിയില്‍ ഹരജി ഫയല്‍ ചെയ്തിരുന്നത്.