കോഴിക്കോട്: നടി പാര്‍വതി തിരുവോത്ത് അമ്മയില്‍ നിന്ന് രാജിവെച്ച സംഭവത്തില്‍ പാര്‍വതിയെ പുകഴ്ത്തി നടന്‍ ഹരീഷ് പേരടി. ഞാനിന്ന് ഒരു പെണ്‍കുട്ടിയേ കണ്ടുവെന്നും നല്ല പെണ്ണത്വമുള്ള ധീരയായ പെണ്‍കുട്ടിയെന്നും പാര്‍വ്വതിയെക്കുറിച്ച് ഹരീഷ് പേരടി പറഞ്ഞു. ആക്രമിക്കപ്പെട്ട നടിയെ കുറിച്ച് അമ്മ ജനറല്‍ സെക്രട്ടറി ഇടവേള ബാബു നടത്തിയ മോശം പരാമര്‍ശത്തെ തുടര്‍ന്നാണ് രാജി.
‘ഞാനിന്ന് ഒരു പെണ്‍കുട്ടിയേ കണ്ടു. നല്ല പെണ്ണത്വമുള്ള ധീരയായ പെണ്‍കുട്ടിയെ. അഭിവാദ്യങ്ങള്‍, മരിച്ചു പോയി എന്ന വാക്ക് ജീവനുള്ള, കടുത്ത യാഥാര്‍ഥ്യങ്ങളിലൂടെ കടന്ന പോയ ഒരു പെണ്‍കുട്ടിക്ക് ഉണ്ടാക്കുന്ന വേദന, മരവിച്ചുപോയ മനസ്സുള്ളവര്‍ക്ക് മാത്രമെ മനസ്സിലാക്കാന്‍ പറ്റാതെ പോവുകയുള്ളു. തെറ്റുകള്‍ ആര്‍ക്കും പറ്റാം. ബോധപൂര്‍വ്വമല്ലാത്ത നാക്കുപിഴയാണെങ്കില്‍ അതിനെ തിരുത്തേണ്ടത് ആ പെണ്‍കുട്ടിയുടെ സ്ത്രീത്വത്തോട് ക്ഷമ ചോദിച്ചുകൊണ്ടാണ്. എന്ന് അഭിപ്രായങ്ങള്‍ ആര്‍ക്കും പണയം വെക്കാത്ത ഹരീഷ് പേരടി’- ഹരീഷ് പേരടി ഫേസ്ബുക്കില്‍ കുറിച്ചു.
ഇന്നലെയാണ് പാര്‍വതി തിരുവോത്ത് ‘അമ്മ’യില്‍ നിന്നും രാജിവെയ്ക്കുന്നതായി ഫേസ്ബുക്കിലൂടെ അറിയിച്ചത്. അമ്മ സംഘടന തഴഞ്ഞ ഒരു വനിത അംഗത്തെ മരിച്ചുപോയ ഒരാളുമായി താരതമ്യപ്പെടുത്തികൊണ്ടു പറഞ്ഞ വെറുപ്പുളവാക്കുന്നതും ലജ്ജാവഹവുമായ വാക്കുകള്‍ ഒരിക്കലും തിരുത്താനാവുന്നതല്ലെന്നും ഇടവേള ബാബുവിന്റെ ഈ പരാമര്‍ശത്തില്‍ പ്രതിഷേധിച്ചാണ് തന്റെ രാജിയെന്നും ഇടവേള ബാബു ‘അമ്മ’ ജനറല്‍ സെക്രട്ടറി സ്ഥാനം ഉടന്‍ രാജി വെയ്ക്കണം എന്നും പാര്‍വതി ഫേസ്ബുക്ക് കുറിപ്പില്‍ വ്യക്തമാക്കിയിരുന്നു.