സംസ്ഥാന ഹജ്ജ് കമ്മിറ്റി മുഖേന കേരളത്തില്‍നിന്ന് ശനിയാഴ്ച നാലു വിമാനങ്ങളിലായി 848 വനിതകള്‍ മക്കയിലേക്കു പുറപ്പെടും. കരിപ്പൂരില്‍നിന്നുള്ള മൂന്നു വിമാനങ്ങളില്‍ 145 പേര്‍ വീതവും കൊച്ചിയില്‍നിന്ന് 413 പേരുമാണ് യാത്രയാകുക. കരിപ്പൂരില്‍നിന്ന് പുലര്‍ച്ചെ 4.20-നും രാവിലെ 8.25-നും വിമാനങ്ങള്‍ ഉണ്ടായിരുന്നു. ഇന്ന് വൈകീട്ട് 6.25-നും എയര്‍ഇന്ത്യ എക്‌സ്പ്രസ് വിമാനം പുറപ്പെടും. കൊച്ചിയില്‍നിന്ന് രാവിലെ 11.30-ന് സൗദി എയര്‍ലൈന്‍സാണ് ഹജ്ജ് സര്‍വീസ് നടത്തുക.
വെള്ളിയാഴ്ച കരിപ്പൂരില്‍നിന്ന് പുലര്‍ച്ചെ 4.20, രാവിലെ 9.35, വൈകീട്ട് 6.35 എന്നീ സമയങ്ങളില്‍ വിമാനങ്ങള്‍ വനിതാ തീര്‍ഥാടകര്‍ക്കായി സര്‍വീസ് നടത്തി. കൊച്ചിയില്‍നിന്ന് വെള്ളിയാഴ്ച 11.32-ന് പുറപ്പെട്ട വിമാനത്തില്‍ 215 പുരുഷന്‍മാരും 198 സ്ത്രീകളും യാത്രയായി. കണ്ണൂരില്‍നിന്ന് ശനിയാഴ്ച സര്‍വീസുകളില്ല. ഞായറാഴ്ച പുലര്‍ച്ചെ 1.45-നാണ് അടുത്ത ഹജ്ജ് സര്‍വീസ്.
നാളെ കരിപ്പൂരില്‍നിന്ന് രാവിലെ ഒന്‍പതിനും വൈകീട്ട് 6.35-നും വിമാനം പുറപ്പെടും. കൊച്ചിയില്‍നിന്ന് ഞായറാഴ്ച സര്‍വീസില്ല. ലക്ഷദ്വീപില്‍നിന്നുള്ള 164 തീര്‍ഥാടകര്‍ തിങ്കളാഴ്ച കൊച്ചിയില്‍നിന്നു പുറപ്പെടും. ഇവര്‍ കഴിഞ്ഞ ദിവസംതന്നെ കപ്പല്‍ മുഖേന കൊച്ചിയില്‍ എത്തിയിട്ടുണ്ട്.