നെടുമ്പാശ്ശേരി :ലക്ഷദീപില്‍ നിന്നും വിശുദ്ധ ഹജ്ജ് കര്‍മ്മത്തിനായി ഇക്കുറി യാത്ര തിരിക്കുന്നത് 163 തീര്‍ത്ഥാടകര്‍.
86 പുരുഷന്മാരും 77 സ്ത്രീകളുമടങ്ങുന്ന സംഘം ഇന്നലെ നെടുമ്പാശ്ശേരി വിമാനത്താവളത്തിലെ ഹജ്ജ് ക്യാമ്പിലെത്തി. ഈ മാസം 12നാണ് സംഘം യാത്ര തിരിക്കുക.
കവരത്തി, കടമത്ത്, അമിനി, മിനി കോയി ദ്വീപുകളില്‍ നിന്നുള്ളവരാണ് സംഘത്തിലുള്ളത്. ഹജ്ജ് തീര്‍ത്ഥാടകരെ സംസ്ഥാന ഹജ്ജ് കമ്മിറ്റിയുടെ നേതൃത്വത്തില്‍ കൊച്ചി തുറമുഖത്ത് സ്വീകരിച്ചു. ലക്ഷദീപ് ഹജ്ജ് കമ്മിറ്റി ചെയര്‍മാന്‍ അബ്ദുള്‍ ഖാദര്‍ ഹജ്ജ് കമ്മിറ്റിയംഗങ്ങളായ കെ.പി മുത്തുകോയ , ഡോ. സാദിഖ് ഒഫിഷ്യല്‍സുകളായ എച്ച് എം ഷംസുദീന്‍, എന്‍. മുസ്തഫ, ഹസ്സന്‍ കോയ എന്നിവരുടെ നേതൃത്വത്തിലെത്തിയ തീര്‍ത്ഥാടക സംഘത്തെ ഹജ്ജ് കമ്മിറ്റിയംഗം സഫര്‍ എ ഖയാല്‍, ഹജ്ജ് കമ്മിറ്റി കോഓഡിനേറ്റര്‍ ടി.കെ. സലീം ഹജ്ജ് സെല്‍ ഓഫീസര്‍ എം.ഐ ഷാജി എന്നിവര്‍ ചേര്‍ന്ന് സ്വീകരിച്ചു. എം വി കോറല്‍സ് കപ്പലില്‍ കില്‍ത്താനി, ചെത്തിലത്ത്, കല്‍പ്പേനി, അന്ത്‌റോത്ത് തുടങ്ങി ദ്വീപുകളില്‍ നിന്നുള്ളവും സംഘത്തിലുണ്ട്. ഇവരെ സഹായിക്കുന്നതിനും മാര്‍ഗ്ഗ നിര്‍ദ്ദേശങ്ങള്‍ നല്‍കുന്നതിനുമായി ഒരു വളന്റിയറും ഇവരോടൊപ്പം യാത്ര തിരിക്കുന്നുണ്ട്.