പുണ്യറമദാനിനെ വരവേല്‍ക്കാന്‍ ഗള്‍ഫ് നാടുകളില്‍ ഒരുക്കങ്ങള്‍ തകൃതിയായി നടക്കുന്നു. വാണിജ്യമേഖലകളില്‍ വന്‍തയാറെടുപ്പും ആകര്‍ഷകമായ വിലക്കുറവുമാണ് ഏര്‍പ്പെടുത്തുന്നത്.പ്രമുഖ വാണിജ്യസ്ഥാപനമായ ലുലു ഹൈപ്പര്‍ മാര്‍ക്കറ്റുകളില്‍ 10,000 ഉല്‍പ്പന്നങ്ങള്‍ക്ക് 60ശതമാനം വിലക്കുറവ് ലഭ്യമായിരിക്കുമെന്ന് എക്‌സിക്യൂട്ടീവ് ഡയറക്ടര്‍ അഷറഫലി എംഎ വാര്‍ത്താ സമ്മേളനത്തില്‍ അറിയിച്ചു.
ആഗോളതലത്തില്‍ ഉണ്ടായിക്കൊണ്ടിരിക്കുന്ന വില വര്‍ധനവില്‍നിന്നും ഒഴിവാക്കിക്കൊണ്ട് 200 ഉല്‍പ്പന്നങ്ങള്‍ക്ക് നിലവിലെ വിലയില്‍ തന്നെ ഉപഭോക്താക്കള്‍ക്ക് ലഭ്യമാക്കുമെന്ന് അദ്ദേഹം വ്യക്തമാക്കി.
സാധാരണക്കാര്‍ക്ക് ഭക്ഷ്യവസ്തുക്കള്‍ അടങ്ങുന്ന ഭക്ഷ്യപാക്കറ്റ് 85 ദിര്‍ഹമിനും 120 ദിര്‍ഹമിനും പ്രത്യേകമായി ലുലു ഹൈപ്പര്‍മാര്‍ക്കറ്റുകളില്‍ ലഭിക്കുന്നതിനുള്ള സംവിധാനം ഏര്‍പ്പെടുത്തിയിട്ടുണ്ട്. ആവശ്യക്കാരുടെ തോതനുസരിച്ചു റമദാന്‍ മാസം മുഴുവന്‍ രാത്രി 2 മണിവരെ ലുലു ഹൈപ്പര്‍ മാര്‍ക്കറ്റുകള്‍ പ്രവര്‍ത്തിക്കും.
അബുദാബി റീജീന്യല്‍ ഡയറക്ടര്‍ ടിപി അബൂബക്കര്‍, റീട്ടെയില്‍ ഓപ്പറേഷന്‍സ് ഡയറക്ടര്‍ ഷാബു അബ്ദുല്‍ മജീദ്, ഡിപ്പാര്‍ട്ടുമെന്റ് സ്റ്റോര്‍ ഡയറക്ടര്‍ നിഷാദ് അബ്ദുല്‍കരീം, മാര്‍ക്കറ്റിംഗ് ആന്റ് കമ്മ്യൂണിക്കേഷന്‍സ് ഡയറക്ടര്‍ വി നന്ദകുമാര്‍,റീട്ടെയില്‍ ഓപ്പറേഷന്‍സ് മേധാവി കെവിന്‍ കന്നിംഗം, ഹനാന്‍ അല്‍ഹുസ്‌നി എന്നിവര്‍ വാര്‍ത്താ സമ്മേളനത്തില്‍ സംബന്ധിച്ചു