കേന്ദ്ര ജിഎസ്ടി സൂപ്രണ്ട് കൈക്കൂലി വാങ്ങുന്നതിനിടെ വിജിലന്‍സിന്റെ പിടിയില്‍. ഒരു ലക്ഷം രൂപ കൈക്കൂലി വാങ്ങുന്നതിനിടയില്‍ കല്‍പ്പറ്റ സിജിഎസ്ടി സൂപ്രണ്ട് പ്രവീന്ദര്‍ സിങ്ങിനെയാണ് വിജിലന്‍സ് വയനാട് യൂണിറ്റ് അറസ്റ്റ് ചെയ്തത്.
വയനാട് സ്വദേശിയും പൊതുമരാമത്ത് കരാറുകാരനുമായ വ്യക്തി അടക്കാനുള്ള പിഴ ഇളവ് ചെയ്തു തരുന്നതിന് മൂന്നു ലക്ഷം രൂപ കൈക്കൂലി നല്‍കണമെന്ന് ഇദ്ദേഹം ആവശ്യപ്പെടുകയായിരുന്നു. ആദ്യഘഡുവായി ഒരു ലക്ഷം രൂപ എത്തിക്കാന്‍ നിര്‍ദ്ദേശം നല്‍കിയതോടെ കരാറുകാരന്‍ വിവരം വിജിലന്‍സിനെ അറിയിക്കുകയായിരുന്നു.
പണം കൈപ്പറ്റിയതിന് പിന്നാലെ വിജിലന്‍സ് എത്തി അറസ്റ്റ് രേഖപ്പെടുത്തുകയായിരുന്നു. പ്രതിയെ കോഴിക്കോട് വിജിലന്‍സ് കോടതിയില്‍ ഹാജരാക്കും.