കണ്ണൂര്‍ ചെറുപുഴയില്‍ വീണ്ടും രാത്രി സഞ്ചാരിയായ അജ്ഞാതന്റെ വിളയാട്ടം. വീടുകളുടെ ചുവരില്‍ ബ്ലാക്ക് മാന്‍ എന്നെഴുതിയിട്ടുണ്ട്. തേര്‍ത്തല്ലിയിലും ചെറുപുഴയിലും അജ്ഞാതന്‍ തുടര്‍ച്ചയായി ഭീതി വിതക്കുകയാണ്. സംഭവത്തില്‍ ഇതുവരെ ആരെയും കണ്ടെത്താന്‍ പൊലീസിനു സാധിച്ചിട്ടില്ല. രാത്രിയില്‍ നിരവധി വീടുകളില്‍ അജ്ഞാതനെത്തുന്നുവെന്ന് നാട്ടുകാര്‍ പറയുന്നു. നാട്ടുകാരാണ് ഇയാള്‍ക്ക് ബ്ലാക്ക് മാന്‍ എന്ന് പേരിട്ടത്.
ഒന്നില്‍ കൂടുതല്‍ ആളുകളുണ്ടെന്നും മുഖം മൂടി സംഘമാണെന്നുമൊക്കെ നാട്ടുകാര്‍ക്കിടയില്‍ അഭിപ്രായമുണ്ട്. ഇതുവരെ മോഷണമൊന്നും നടന്നിട്ടില്ല. വാതിലുകളില്‍ മുട്ടുക, അലക്കിവെച്ചിരിക്കുന്ന തുണി മാറ്റിവെക്കുക, പൈപ്പ് തുറന്നുവെക്കുക തുടങ്ങിയവയാണ് അജ്ഞാതന്റെ ചെയ്തികള്‍. സിസിടിവികളില്‍ അവ്യക്തമായ രൂപം പതിഞ്ഞിട്ടുണ്ടെന്നും നാട്ടുകാര്‍ പറയുന്നു.