കേരളത്തിന്റെ സാമ്പത്തിക പ്രതിസന്ധിയില്‍ പ്രതിപക്ഷം കൊണ്ടുവന്ന അടിയന്തര പ്രമേയ ചര്‍ച്ച ആരംഭിച്ചു. റോജി എം. ജോണ്‍ അടിയന്തര പ്രമേയം അവതരിപ്പിച്ചു. സംസ്ഥാനം കടുത്ത സാമ്പത്തിക പ്രതിസന്ധിയിലാണെന്നത് പച്ചയായ സത്യമാണെന്നും 26,500 കോടിയോളം രൂപ കുടിശികയാണെന്നും അടിയന്തര പ്രമേയത്തില്‍ ചൂണ്ടിക്കാട്ടി.
കാലോചിതമായ പരിഷ്‌കാരം കൊണ്ടുവരുന്നതില്‍ സര്‍ക്കാര്‍ പരാജയപ്പെട്ടു. പ്രതിസന്ധിയുടെ പ്രധാന കാരണം നികുതി പിരിവിലെ പോരായ്മയാണ്. അഴിമതിയും കെടുകാര്യസ്ഥതയും ആണ് സാമ്പത്തിക പ്രതിസന്ധിക്കു കാരണം. സര്‍ക്കാരിന്റെ ധൂര്‍ത്ത് പ്രതിസന്ധിക്ക് ആക്കം കൂട്ടിയത്. കേന്ദ്ര സര്‍ക്കാര്‍ നയങ്ങളും തിരിച്ചടിയായെന്ന് റോജി എം. ജോണ്‍ പറഞ്ഞു.
ഈ സാമ്പത്തിക പ്രതിസന്ധിക്ക് കാരണം കഴിഞ്ഞ എല്‍.ഡി.എഫ് സര്‍ക്കാറാണ്. അന്ന് നടപ്പിലാക്കേണ്ട പല കാര്യങ്ങളും നടപ്പിലാക്കിയില്ല. നികുതി വകുപ്പ് പൂര്‍ണമായി പരാജയപ്പെട്ടു. ജിഎസ്ടി വരുമ്പോള്‍ കേരളത്തിലാണ് ഏറ്റവും അധികം ഗുണം ഉണ്ടാകേണ്ടിയിരുന്നത്. സര്‍ക്കാര്‍ അമ്പേ പരാജയമാണെന്നും റോജി എം. ജോണ്‍ വ്യക്തമാക്കി.