പത്തനംതിട്ട വടശ്ശേരിക്കരയില്‍ സുഹൃത്തിനൊപ്പം വീട്ടില്‍നിന്ന് പോയ യുവാവിനെ കാണാതായതില്‍ ദുരൂഹതയെന്ന് കുടുംബം. പത്തനംതിട്ട വടശ്ശേരിക്കര തലച്ചിറ സ്വദേശിയായ 23 കാരന്‍ സംഗീത് സജിയെ കാണാതായിട്ട് രണ്ടാഴ്ചയായി.
സുഹൃത്തായ പ്രദീപിനൊപ്പം ഓട്ടോറിക്ഷയില്‍ പോയതാണ് സംഗീത്. ഏറെ വൈകിയും സംഗീത് വീട്ടിലെത്തിയില്ല. സംഗീതിന്റെ ഫോണില്‍ ബന്ധപ്പെടാന്‍ ശ്രമിച്ചെങ്കിലും ലഭ്യമായില്ല. പ്രദീപിനെ വിളിച്ചിട്ടും ഫലമുണ്ടായില്ല. ഇടത്തറ ഭാഗത്ത് കടയില്‍ നിന്ന് സാധനങ്ങള്‍ വാങ്ങാന്‍ ഓട്ടോറിക്ഷ നിര്‍ത്തിയെന്നും പിന്നീട് സംഗീതിനെ കാണാതായി എന്നാണ് പ്രദീപ് പറയുന്നത്.
സമീപത്തെ തോട്ടില്‍ എന്തോ വീഴുന്ന ശബ്ദം കേട്ടുവെന്നും പ്രതീപ് പറയുന്നു. ഫയര്‍ഫോഴ്‌സും പൊലീസും തിരച്ചില്‍ നടത്തിയെങ്കിലും ഫലം കണ്ടില്ല. സംഭവത്തില്‍ കൃത്യമായി അന്വേഷണം പൊലീസ് നടത്തുന്നില്ലെന്ന് കുടുംബം ആരോപിക്കുന്നു. വിശദമായ അന്വേഷണം ആവശ്യപ്പെട്ട് കുടുംബം ജില്ലാ പൊലീസ് മേധാവിക്ക് പരാതി നല്‍കി.