കൊച്ചി: സ്വര്‍ണക്കടത്തു കേസില്‍ മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കറിന്റെ പങ്ക് തെളിയിക്കുന്ന സുപ്രധാന തെളിവ് കിട്ടിയെന്ന് കസ്റ്റംസ്. കേസില്‍ ശിവശങ്കറിന് നേരിട്ട് പങ്കുണ്ടെന്നും സുപ്രധാന കണ്ണിയാണെന്നും കസ്റ്റംസ് റിപ്പോര്‍ട്ടിലുണ്ട്. ഉന്നത പദവിയിലിരിക്കുന്ന ഒരാള്‍ ഇതില്‍ ഉള്‍പെട്ടത് കേരള ചരിത്രത്തില്‍ കേട്ടുകേള്‍വി ഇല്ലാത്തതാണെന്നും കസ്റ്റംസ് റിപ്പോര്‍ട്ടില്‍ പറയുന്നു.
രണ്ടാഴ്ച നടത്തിയ ചോദ്യം ചെയ്യലിലെ സുപ്രധാന ചോദ്യങ്ങളില്‍ നിന്നും ശിവശങ്കര്‍ ഒഴിഞ്ഞുമാറുകയാണെന്ന് കസ്റ്റംസ് കോടതിയെ അറിയിച്ചു. ശിവശങ്കറിനൊപ്പം കൂടുതല്‍ പേരെ ഇനിയും ചോദ്യം ചെയ്യണമെന്നും കസ്റ്റംസ് കോടതിയെ അറിയിച്ചു.
അതേ സമയം സ്വര്‍ണക്കള്ളക്കടത്തില്‍ സ്വപ്നയുടെ രഹസ്യമൊഴിയെടുക്കല്‍ ഇന്നും കോടതിയില്‍ തുടരുകയാണ്.