തലവേദന മാറ്റിയെടുക്കാന്‍ ആള്‍ദൈവം തലക്കടിച്ച് യുവതിക്ക് ദാരുണാന്ത്യം. കര്‍ണാടകയില്‍ ആണ് സംഭവം. കഠിനമായ തലവേദന അനുഭവപ്പെട്ട യുവതി ആള്‍ദൈവത്തെ സമീപിക്കുകയായിരുന്നു. ആള്‍ദൈവം തലവേദന മാറ്റാന്‍ തലയിലും ദേഹത്തും അടിച്ചതിനെ തുടര്‍ന്ന് യുവതി മരണപ്പെട്ടു.
കര്‍ണാടകയിലെ ഹാസന്‍ ജില്ലയിലെ 37 വയസ്സ് പ്രായമുള്ള പാര്‍വതി എന്ന യുവതിയാണ് ആള്‍ ദൈവത്തിന്റെ അടിയേറ്റ് ദാരുണാന്ത്യത്തിലെത്തിയത്. സംഭവത്തില്‍ ബേക്ക ഗ്രാമത്തിലെ ആള്‍ദൈവം മനു ഒളിവിലാണ്. ഇയാള്‍ക്കെതിരെ പൊലീസ് കേസെടുത്തിട്ടുണ്ട്.
മരിച്ച പാര്‍വ്വതിയുടെ ഏകമകള്‍ വ്യാഴാഴ്ച പോലീസില്‍ പരാതി നല്‍കിയതോടെയാണ് സംഭവം പുറത്തറിയുന്നത്.
കഴിഞ്ഞ രണ്ടു മാസത്തോളമായി കടുത്ത തലവേദന അനുഭവിക്കുന്ന പാര്‍വതി നിരവധി ഡോക്ടര്‍മാരെ കണ്ടിരുന്നു. ഒടുവിലാണ് ആള്‍ ദൈവത്തിന്റെ അടുത്തെത്തിയത്. ഒരുബന്ധു മുഖാന്തരമായിരുന്നു ആള്‍ദൈവത്തെ കുറിച്ച് അറിയുന്നത്.
ഡിസംബര്‍ രണ്ടിനാണ് ആള്‍ ദൈവമായ മനുവിന്റെ അടുത്ത് ആദ്യമായി എത്തുന്നത്. അന്നേദിവസം ഒരു നാരങ്ങ കൊടുത്ത പറഞ്ഞയയ്ക്കുകയും ചെയ്തു. തൊട്ടടുത്ത ദിവസം വീണ്ടും വരാന്‍ ആവശ്യപ്പെട്ടു. ശേഷം ഡിസംബര്‍ ഏഴിന് ചികിത്സയ്ക്കായി എത്താന്‍ ആവശ്യപ്പെടുകയും ഇതനുസരിച്ച് കഴിഞ്ഞ ചൊവ്വാഴ്ച പാര്‍വതിയും സുഹൃത്തുക്കളും ചികിത്സയ്‌ക്കെത്തി. തലവേദന മാറ്റാന്‍ എന്നപേരില്‍ ആള്‍ദൈവം ശരീരത്തില്‍ ഉടനീളം വടികൊണ്ട് അടിച്ചു. കുഴഞ്ഞുവീണ പാര്‍വതിയെ ആശുപത്രിയില്‍ എത്തിച്ചെങ്കിലും മരണപ്പെടുകയായിരുന്നു. പോസ്റ്റുമോര്‍ട്ടം റിപ്പോര്‍ട്ടില്‍ തലയ്‌ക്കേറ്റ ക്ഷതമാണ് മരണകാരണമെന്ന് ഡോക്ടര്‍മാര്‍ പറഞ്ഞു.സംഭവത്തില്‍ നിലവില്‍ കൊലപാതകത്തിന് കേസെടുത്തിട്ടുണ്ട്.