പ്രേതബാധ ഭയന്ന് ചന്ദ്രയാന്‍ 2 ന്റെ ഡെപ്യൂട്ടി പ്രോജക്ട് ഡയറക്ടറുടെ നാട്ടില്‍ സ്‌കൂളില്‍ പോകാതെ വിദ്യാര്‍ത്ഥികള്‍. ചന്ദ്രകാന്ത കുമാറിന്റെ നാടായ പശ്ചിമബംഗാളിലെ ഹൂഗ്ലിയിലാണ് സംഭവം. ഹൂഗ്ലിയിലെ ശ്രീ അരബിന്ദോ വിദ്യാമന്ദിര്‍ ഇംഗ്ലീഷ് മീഡിയം സ്‌കൂളിലാണ് പ്രേതബാധയുള്ളതായി വാര്‍ത്തകള്‍ പ്രചരിച്ചത്. ഇതോടെ വിദ്യാര്‍ത്ഥികള്‍ സ്‌കൂളിലേക്ക് എത്താതെയായി. സ്‌കൂളില്‍ നിന്ന് പേടിപ്പെടുത്തുന്ന രീതിയില്‍ സ്ത്രീയുടെ ശബ്ദം കേള്‍ക്കുന്നുവെന്നാണ് പരാതി.
സ്‌കൂളിന് അടുത്തുള്ള വീട്ടില്‍ വര്‍ഷങ്ങള്‍ക്ക് മുന്‍പ് ആത്മഹത്യ ചെയ്ത സ്ത്രീയുടേയും അപകടത്തില്‍ മരിച്ച സ്‌കൂളിലെ വിദ്യാര്‍ത്ഥിനിയുടേയും ശബ്ദമാണ് കേള്‍ക്കുന്നതെന്നാണ് വിദ്യാര്‍ത്ഥികള്‍ ആരോപിക്കുന്നത്. നിലവില്‍ സ്‌കൂളിന്റെ പ്രവര്‍ത്തനം തകരാറിലാക്കുന്ന രീതിയിലാണ് കുട്ടികളുടെ കൊഴിഞ്ഞ് പോക്കെന്നാണ് അധ്യാപകര്‍ പറയുന്നു. സ്‌കൂളില്‍ വിദ്യാര്‍ത്ഥികള്‍ക്കൊപ്പമെത്തിയ രക്ഷിതാക്കള്‍ വ്യാജപ്രചാരണങ്ങളെക്കുറിച്ച് ബോധവല്‍ക്കരണ ശ്രമങ്ങള്‍ ആരംഭിച്ചിട്ടുണ്ട്.