സംസ്ഥാനത്ത് നാല് പേര്‍ക്ക് കൂടി ഒമിക്രോണ്‍ വകഭേദം സ്ഥിരീകരിച്ചതായി ആരോഗ്യമന്ത്രി വീണ ജോര്‍ജ് അറിയിച്ചു
നാലുപേരും തിരുവനന്തപുരം ജില്ലയില്‍ ഉള്ളതാണ്.ഇതോടെ സംസ്ഥാനത്തെ ആകെ ഒമിക്രോണ്‍ കേസുകള്‍ 15ആയി.
തിരുവനന്തപുരത്ത് കഴിഞ്ഞ ദിവസം ഒമിക്രോണ്‍ സ്ഥിതീകരിച്ച 17 വയസ്സുകാരന്‍ ഒപ്പം യുകെയില്‍ നിന്നെത്തിയ മാതാവ്(41) പ്രാഥമിക സമ്പര്‍ക്ക പട്ടികയില്‍ ഉള്‍പ്പെട്ട അമ്മൂമ്മ (67) യുകെയില്‍ നിന്ന് എത്തിയ യുവതി (27), നൈജീരിയയില്‍ നിന്നും എത്തിയ യുവാവ് (32) എന്നിവര്‍ക്കാണ് ഒമിക്രോണ്‍ വകഭേദം സ്ഥിതീകരിച്ചത്.
ഡിസംബര്‍ 12ന് തിരുവനന്തപുരത്തെത്തിയ 27 വയസ്സുകാരി വീട്ടില്‍ നിരീക്ഷണത്തില്‍ ഇരുന്ന ശേഷം ഡിസംബര്‍ 16ന് പരിശോധിച്ചപ്പോഴാണ് കൊവിഡ് പോസിറ്റീവായത്. ഇവര്‍ സമ്പര്‍ക്ക പട്ടികയില്‍ ഉള്‍പ്പെട്ട ആളാണ്. 32 വയസ്സുകാരന്‍ ഡിസംബര്‍ 17ന് നൈജീരിയയില്‍ നിന്ന് എത്തുകയും വിമാനത്താവളത്തിലെ പരിശോധനയില്‍ കോവിഡ് പോസിറ്റീവ് ആയതിനെ തുടര്‍ന്ന് ആശുപത്രിയില്‍ പ്രത്യേക വാര്‍ഡില്‍ പ്രവേശിപ്പിക്കുകയായിരുന്നു.
കോവിഡ് പോസിറ്റീവ് ആയതിനെ തുടര്‍ന്ന് രാജീവ് ഗാന്ധി സെന്റര്‍ ഫോര്‍ ബയോടെക്‌നോളജിയില്‍ അയച്ച സാമ്പിളുകളുടെ പരിശോധനാ ഫലത്തില്‍ ആണ് ഇവര്‍ക്ക് ഒമിക്രോണ്‍ സ്ഥിരീകരിച്ചത്.