കൊച്ചി: നെടുമ്പാശേരി വിമാനത്താവളത്തിലെത്തിയ അഫ്ഗാന്‍ സ്വദേശിയില്‍ നിന്ന് 10 കോടിയുടെ വിദേശ കറന്‍സി പിടികൂടി. അഫ്ഗാന്‍ സ്വദേശിയായ യൂസഫ് മുഹമ്മദ് സിദ്ദീഖ് എന്നയാളെ കസ്റ്റഡിയിലെടുത്തു. ഇന്ന് രാവിലെ നടത്തിയ പരിശോധനയിലാണ് കറന്‍സി പിടിച്ചെടുത്തത്. പിടിച്ചെടുത്ത കറന്‍സികളില്‍ ഭൂരിഭാഗവും അമേരിക്കന്‍ ഡോളറുകളാണ്.
ഇന്ന് രാവിലെ പുറപ്പെടുന്ന എമിറേറ്റ്‌സ് വിമാനത്തില്‍ പോകാനായി സുരക്ഷാ പരിശോധനകള്‍ നടത്തവേയാണ് എക്‌സ് റേ പരിശോധനയില്‍ കറന്‍സികള്‍ കണ്ടെത്തിയത്. രാജ്യത്തെ ഏറ്റവും വലിയ വിദേശ കറന്‍സി വേട്ടകളിലൊന്നാണിത്.
ഇന്നലെ രാത്രി പുറപ്പെടേണ്ട എയര്‍ ഇന്ത്യയുടെ ഡല്‍ഹി-കൊച്ചി-ദുബൈ വിമാനത്തിലാണിയാള്‍ എത്തിയത്. വിമാനം കൊച്ചിയില്‍ സാങ്കേതിക തകരാറിനെ തുടര്‍ന്ന് കുടുങ്ങിയതോടെ യാത്രക്കാരെ ഹോട്ടലുകളിലേക്ക് മാറ്റി. ഇന്ന് അവരെ വിവിധ വിമാനങ്ങളില്‍ ദുബൈയിലേക്ക് അയക്കുന്നതിനിടെ നടത്തിയ സുരക്ഷാ പരിശോധനയിലാണ് കറന്‍സി പിടികൂടിയത്.