ലണ്ടന്‍:ബാര്‍സിലോണയില്‍ നിന്നും പി.എസ്.ജിയിലെത്തിയപ്പോള്‍ പതിവ് പോലെ ഗോള്‍ വേട്ടക്കാരനാവാന്‍ ലിയോ മെസിക്കായില്ല എന്നത് സത്യം. പക്ഷേ ലോകത്തെ അതി സമ്പന്നനായ കായിക താരങ്ങളുടെ പട്ടികയില്‍ ഒന്നാമന്‍ മറ്റാരുമല്ല. ഫോബ്‌സിന്റെ സമ്പന്ന പട്ടികയില്‍ 107 ദശലക്ഷം ഡോളറിന്റെ വാര്‍ഷിക വരുമാനവുമായി അര്‍ജന്റീനക്കാരന്‍ തന്നെ ഒന്നാമന്‍.
സഊദി അറേബ്യയിലായിരുന്നു കഴിഞ്ഞ ദിവസം മെസി. അറബ് രാജ്യത്തില്‍ അദ്ദേഹമെത്തിയത് പരസ്യ ചിത്രീകരണത്തിനായിരുന്നു. ഈ സീസണില്‍ ബാര്‍സ വിട്ട് പി.എസ്.ജിയിലെത്തിയ സൂപ്പര്‍ താരത്തിന് പക്ഷേ ഫ്രഞ്ച് ലീഗ് കിരീടം മാത്രമാണ് സീസണില്‍ സമ്പാദിക്കാനായത്. അമേരിക്കയുടെ വിഖ്യാത ബാസ്‌ക്കറ്റ് ബോള്‍ താരം ലിബ്രോണ്‍ ജെയിംസാണ് രണ്ടാമന്‍. മൂന്നാമന്‍ മാഞ്ചസ്റ്റര്‍ യുനൈറ്റഡ് മെഗാ താരം കൃസ്റ്റിയാനോ റൊണാള്‍ഡോയാണ്.
2022 മെയ് 1 ന് അവസാനിച്ച വര്‍ഷത്തില്‍ മെസിയുടെ പരസ്യവരുമാനം മാത്രം 55 ദശലക്ഷം ഡോളറാണ്. യുവന്തസില്‍ നിന്നും തന്റെ ആദ്യകാല ക്ലബായ മാഞ്ചസ്റ്റര്‍ യുനൈറ്റഡിലെത്തിയ റൊണാള്‍ഡോക്ക് ക്ലബിന് കിരീടങ്ങള്‍ സമ്മാനിക്കാനായില്ല. പക്ഷേ അദ്ദേഹത്തിന്റെ ജനപ്രീതിക്ക് 37-ാം വയസിലും ഒട്ടും ഇടിവ് സംഭവിച്ചിട്ടില്ല.