കൊച്ചി പറവൂരിലെ മജ്‌ലിസ് ഹോട്ടലില്‍ നിന്ന് ഭക്ഷ്യവിഷബാധയേറ്റ് ചികിത്സയിലായിരുന്നയാള്‍ മരിച്ചു. ചേന്ദമംഗലം സ്വദേശി ജോര്‍ജ് (57) ആണ് മരിച്ചത്. ആശുപത്രിയില്‍ നിന്ന് ഡിസ്ചാര്‍ജ് ചെയ്ത് വീട്ടിലെത്തിയതിന് പിന്നാലെയാണ് മരണം സംഭവിച്ചത്. രണ്ട് ദിവസം മുമ്പ് ആശുപത്രി വിട്ട് വീട്ടിലെത്തിയ ജോര്‍ജ് ശനിയാഴ്ച രാത്രിയോടെയാണ് മരിച്ചത്.
പോസ്റ്റ്‌മോര്‍ട്ടത്തിനു ശേഷം മാത്രമെ ഭക്ഷ്യവിഷബാധയെ തുടര്‍ന്നാണൊ മരണം സംഭവിച്ചത് എന്ന കാര്യം വ്യക്തമാവുകയൊള്ളുവെന്ന് ആരോഗ്യവകുപ്പ് അറിയിച്ചു. ജനുവരി 16നാണ് പറവൂരിലെ മജ്‌ലിസ് ഹോട്ടലില്‍ നിന്ന് ജോര്‍ജ് ഭക്ഷണം പാര്‍സല്‍ വാങ്ങി കഴിച്ചത്. ഇതിനു പിന്നാലെ വയറു വേദനയെ തുടര്‍ന്ന് 19ന് എറണാകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു. 27 നാണ് ആശുപത്രി വിട്ടത്.