ഫ്‌ളോറിഡ: ഫ്‌ളോറിഡയില്‍ അടച്ചിട്ട കാറിനുള്ളില്‍ അഞ്ചു മണിക്കൂറോളം കഴിഞ്ഞ പത്തു മാസം പ്രായമായ കുഞ്ഞു മരിച്ചു. സംഭവത്തില്‍ കുഞ്ഞിന്റെ കെയര്‍ടേക്കറായ റോണ്ട ജുവലിനെ പൊലീസ് അറസ്റ്റു ചെയ്തു. മറ്റ് രണ്ടു കുട്ടികള്‍ക്കൊപ്പം പത്തുമാസം പ്രായമായ കുഞ്ഞിനെയും സ്വന്തം വീട്ടിലേക്ക് കൊണ്ടുപോവുകയായിരുന്നു ജുവല്‍. വീടെത്തിയപ്പോള്‍ കുഞ്ഞ് ഉറക്കമായിരുന്നതിനാല്‍ മറ്റ് കുട്ടികളുമായി അവര്‍ അകത്തേക്ക് പോയി. കുഞ്ഞ് വാഹനത്തിനുള്ളില്‍ ഉള്ളത് ജുവല്‍ മറന്നു.
തുടര്‍ന്ന് അഞ്ചു മണിക്കൂറോളം കഴിഞ്ഞ് കുഞ്ഞുങ്ങളുടെ മാതാവ് എത്തി അന്വേഷിച്ചപ്പോഴാണ് കുഞ്ഞ് കാറിലാണെന്ന് ജുവലിന് ഓര്‍മ വന്നത്. അബോധാവസ്ഥയിലായ കുഞ്ഞിനെ സമീപത്തെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. അമേരിക്കയില്‍ സമാനരീതിയില്‍ കാറില്‍ കുഞ്ഞുങ്ങളെ മറന്നുവെച്ച് ഈ വര്‍ഷം റിപ്പോര്‍ട്ട് ചെയ്ത 14-ാമത്തെ മരണമാണിത്. ഫ്‌ളോറിഡയില്‍ മാത്രം ആറു കുട്ടികള്‍ ഇതേ രീതിയില്‍ മരിച്ചിട്ടുണ്ട്.