ഫിറ്റ്‌നസ് സെന്റര്‍ ആക്രമിക്കുകയും കവര്‍ച്ച നടത്തുകയും ചെയ്ത സംഭവത്തിലെ പ്രതികള്‍ അറസ്റ്റില്‍. ചങ്ങനാശ്ശേരി പെരുന്ന വലിയ മാളികപ്പുറത്ത് വീട്ടില്‍ ബിജുമോന്‍ വര്‍ഗീസ് (42), കാക്കനാടിന് സമീപം പടമുകള്‍ ഓലിക്കുഴി വീട്ടില്‍ സലാഹുദ്ദീന്‍ (32) എന്നിവരെയാണ് ഇന്‍ഫോപാര്‍ക്ക് പൊലീസ് പിടികൂടിയത്.
കേസില്‍ രണ്ടാം പ്രതിയായ സലാഹുദ്ദീന്‍ സി.പി.എം തൃക്കാക്കര വെസ്റ്റ് ലോക്കല്‍ കമ്മിറ്റി അംഗമാണ്. കാക്കനാട് ജില്ല ജയിലിന് സമീപം പ്രവര്‍ത്തിക്കുന്ന ബ്രൗണി ബ്രൂട്ട് എന്ന സ്ഥാപനത്തില്‍ സാമ്ബത്തിക ഇടപാടിന്റെ പേരില്‍ അതിക്രമിച്ചുകയറി കവര്‍ച്ച ചെയ്യുകയും ജീവനക്കാരെ ദേഹോപദ്രവും ഏല്‍പിക്കുകയും ചെയ്ത കേസിലാണ് അറസ്റ്റ്. സ്ഥാപന ഉടമ പാലക്കാട് സ്വദേശി എസ്. സുധീഷിന്റെ പരാതിയിലാണ് നടപടി.
കഴിഞ്ഞ ക്രിസ്മസ് ദിനത്തിലായിരുന്നു സംഭവം. രാത്രി 11.30ഓടെ നാല്‍പതോളം ആളുകള്‍ സ്ഥാപനത്തിലെത്തുകയും ഉടമകളെയും ജീവനക്കാരെയും മാരകായുധങ്ങളുപയോഗിച്ച് ദേഹോപദ്രവം ഏല്‍പിക്കുകയും ഭീഷണിപ്പെടുത്തി ചെക്ക് ഒപ്പിട്ടുവാങ്ങുകയും കവര്‍ച്ച നടത്തുകയുമായിരുന്നു.