ചെന്നൈ: സമുദ്രാതിര്‍ത്തി മറികടന്നുവെന്ന് ആരോപിച്ച് 12 ഇന്ത്യന്‍ മത്സ്യത്തൊഴിലാളികളെ ശ്രീലങ്കന്‍ നാവികസേന അറസ്റ്റ് ചെയ്തു. രണ്ട് മീന്‍പിടുത്ത ട്രോളറുകളും പിടിച്ചെടുത്തിട്ടുണ്ട്. രാമേശ്വരത്തുനിന്ന് ബോട്ടുകളില്‍ മീന്‍ പിടിക്കാന്‍ പോയ സംഘത്തില്‍പ്പെട്ടവരാണ് പിടിയിലായത്. 12ന് അര്‍ധരാത്രിയോടെ തലൈമന്നാറിന് വടക്ക് കടലില്‍വെച്ചാണ് സംഭവം. തമിഴ്‌നാടിനെ ശ്രീലങ്കയില്‍ നിന്ന് വേര്‍തിരിക്കുന്ന പാക് കടലിടുക്ക് ഇരു രാജ്യങ്ങളിലെയും മത്സ്യത്തൊഴിലാളികളുടെ ഇഷ്ട മത്സ്യബന്ധന കേന്ദ്രമാണ്. ഈ മാസം ഇത് മൂന്നാം തവണയാണ് ശ്രീലങ്കന്‍ കടലില്‍ ഇന്ത്യന്‍ മത്സ്യത്തൊഴിലാളികള്‍ അറസ്റ്റിലാകുന്നത്. എട്ടിന് 11 ഇന്ത്യന്‍ മത്സ്യത്തൊഴിലാളികളെ നാവികസേന അറസ്റ്റ് ചെയ്യുകയും മൂന്ന് ബോട്ടുകള്‍ പിടിച്ചെടുക്കുകയും ചെയ്തിരുന്നു. ഒന്നിന് 21 ഇന്ത്യന്‍ മത്സ്യത്തൊഴിലാളികളെ അറസ്റ്റ് ചെയ്തിരുന്നു.