മലപ്പുറം: കോവിഡ് കാലത്ത് ജോലി വഴിമുട്ടിയതോടെ വഴിയോരക്കച്ചവടം നടത്തേണ്ടി വന്ന അബ്ദുല്‍ കലാം മുസ്ലിയാര്‍ക്ക് സഹായം വാഗ്ദാനം ചെയ്ത് ഫിറോസ് കുന്നംപറമ്പില്‍. അദ്ദേഹത്തിന്റെ പ്രശ്‌നങ്ങള്‍ ചോദിച്ച് മനസ്സിലാക്കിയെന്നും എന്താവശ്യമുണ്ടെങ്കിലും സഹായിക്കാന്‍ തയ്യാറാണെന്നും ഫിറോസ് കുന്നംപറമ്പില്‍ പറഞ്ഞു.
മലപ്പുറം-പാലക്കാട് ദേശീയപാതയിൽ മക്കരപ്പറമ്പ് നാറാണത്ത് ഓഡിറ്റോറിയത്തിന് സമീപമാണ്‌ താടിയും തലപ്പാവും ധരിച്ച് കലാം മുസ്‌ലിയാര്‍ കപ്പ കച്ചവടം നടത്തുന്നത്. കോവിഡ്മൂലം മദ്റസയിലെയും പള്ളിയിലെയും ജോലി ഇല്ലാതായതോടെ ജീവിതം കൂട്ടിമുട്ടിക്കാനായി തെരുവുകച്ചവടക്കാരന്റെ റോൾ എടുക്കുകയായിരുന്നു. സ്വന്തമായി വീടില്ല. തച്ചിങ്ങനാടം അരിക്കണ്ടംപാക്ക് നെല്ലൂർ സ്വദേശിയായ ഇദ്ദേഹം വടക്കേ കുളമ്പിൽ ഭാര്യവീടിന് സമീപത്ത് ക്വാർട്ടേഴ്സിലാണ് താമസിക്കുന്നത്.
ദിവസവും 100 കിലോ കപ്പ വാങ്ങും. രാവിലെ ഒമ്പതിന് തുടങ്ങുന്ന കച്ചവടം കപ്പ വിറ്റ് തീരുന്നതുവരെ തുടരും. 10 വർഷമായി പാലക്കാട്, മലപ്പുറം, കോഴിക്കോട്, കാസർകോട് ജില്ലകളിൽ മദ്റസകളിലും പള്ളികളിലും ജോലി ചെയ്തിരുന്നു. കഴിഞ്ഞ രണ്ട് വർഷമായി കാസർകോട് കുമ്പളയിലായിരുന്നു. കോവിഡും തുടർന്നുണ്ടായ ലോക്ഡൗണും പുതിയ മേച്ചിൽപുറം തേടാൻ അദ്ദഹത്തെ നിർബന്ധിതനാക്കി. കച്ചവടം തുടങ്ങിയിട്ട് നാലഞ്ചുദിവസമായെന്നും കുഴപ്പമില്ലാതെ നടക്കുന്നുണ്ടെന്നും മുസ്ലിയാർ പറയുന്നു. ഭാര്യയും ഒമ്പത്, അഞ്ച് വയസ്സുള്ള മക്കളും ഉൾപ്പെടുന്നതാണ് കുടുംബം.