നീലേശ്വരം തെരു അഞ്ഞൂറ്റമ്പലം വീരാര്‍കാവിലെ കളിയാട്ട മഹോത്സവത്തോട് അനുബന്ധിച്ച് പടക്കശേഖരത്തിന് തീപിടിച്ച സംഭവത്തില്‍ 150ലേറെ പേര്‍ക്ക് പൊള്ളലേറ്റു. ഇതില്‍ നാലു പേരുടെ നില ഗുരുതരമാണ്.
കോഴിക്കോട് മിംസ് ആശുപത്രിയില്‍ ഗുരുതര പരിക്കേറ്റ ഷിബിന്‍ രാജ് (19), ബിജു (38), രതീഷ് (30), വിഷ്ണു എന്നിവര്‍ ചികിത്സയിലണ്. 50 ശതമാനം പൊള്ളലേറ്റ ഇവര്‍ വെന്റിലേറ്ററിലാണ്. ഗുരുതര പൊള്ളലേറ്റവര്‍ കണ്ണൂര്‍ പരിയാരം മെഡിക്കല്‍ കോളജ്, കോഴിക്കോട് മിംസ്, കോഴിക്കോട് മെഡിക്കല്‍ കോളജ് ആശുപത്രികളില്‍ ചികിത്സയിലാണ്.
തിങ്കളാഴ്ച അര്‍ധരാത്രി 12 മണിയോടെയാണ് അപകടം നടന്നത്. മൂവാളംകുഴി ചാമുണ്ഡി തെയ്യത്തിന്റെ കുളിച്ച് തോറ്റം ചടങ്ങിനിടെയാണ് അപകടമുണ്ടായത്. വെടി പൊട്ടിക്കുന്നതിനിടെ വെടിക്കെട്ട് പുരയില്‍ പടക്കശേഖരത്തിന് തീപ്പൊരി വീണാണ് അപകടമുണ്ടായതെന്നാണ് പ്രാഥമിക വിവരം.
അപകടത്തെ തുടര്‍ന്ന് പരിഭ്രാന്തരായ ജനക്കൂട്ടം ഓടി രക്ഷപ്പെടുന്നതിനിടയില്‍ വീണും പലര്‍ക്കും പരിക്കേറ്റു.