ചലച്ചിത്ര നിര്‍മാതാവ് കെ.രവീന്ദ്രനാഥന്‍ (അച്ചാണി രവി-90) അന്തരിച്ചു. വാര്‍ധക്യസഹജമായ അസുഖത്തെത്തുടര്‍ന്നാണ് മരണം. അദ്ദേഹത്തിന്റെ സിനിമാ നിര്‍മ്മാണ ജീവിതത്തില്‍ ഒരുപാട് കലാമൂല്യമുള്ള സിനിമകള്‍ നിര്‍മ്മിക്കാന്‍ അദ്ദേഹത്തിന് സാധിച്ചു. 1967ല്‍ പുറത്തിറങ്ങിയ പി.ഭാസ്‌കരന്‍ സംവിധാനം ചെയ്ത ‘അന്വേഷിച്ചു, കണ്ടെത്തിയില്ല’ ആണ് അദ്ദേഹം നിര്‍മ്മിച്ച ആദ്യ ചിത്രം.
കാഞ്ചനസീത, തമ്പ്, കുമ്മാട്ടി, എസ്തപ്പാന്‍, പോക്കുവെയില്‍ എന്നീ അരവിന്ദന്‍ സിനിമകളുടെയും എലിപ്പത്തായം, മുഖാമുഖം, അനന്തരം, വിധേയന്‍ എന്നീ അടൂര്‍ ചിത്രങ്ങളുടെയും നിര്‍മാണം അദ്ദേഹം നിര്‍വഹിച്ചു. നിര്‍മിച്ച 14 ചിത്രങ്ങളില്‍ നിന്ന് 18 ദേശീയ-സംസ്ഥാന പുരസ്‌കാരങ്ങളും നേടിയിട്ടുണ്ട്. സമഗ്ര സംഭാവനയ്ക്കുള്ള ജെ.സി ഡാനിയല്‍ പുരസ്‌കാരം നല്‍കി കേരളം അദ്ദേഹത്തെ ആദരിച്ചിരുന്നു.