ന്യൂഡല്‍ഹി: അര്‍ണാബ് ഗോസാമിയുടെ നേതൃത്വത്തിലുള്ള റിപ്പബ്ലിക് ടിവി റേറ്റിംഗില്‍ കൃത്രിമത്വം കാണിച്ചുവെന്ന് മുംബൈ പൊലീസ്. ഇതു പ്രകാരം രണ്ടു പേരെ പൊലീസ് അറസ്റ്റ് ചെയ്തു. മൂന്ന് ചാനലുകള്‍ കൃത്രിമത്വം കാണിച്ചതായി തെളിഞ്ഞുവെന്ന് പൊലീസ് അറിയിച്ചു.
കേസ് അന്വേഷണത്തിന്റെ ഭാഗമായി റിപ്പബ്ലിക് ടിവിയിലുള്ളവരെ ഇന്നോ നാളെയോ പൊലീസ് ചോദ്യം ചെയ്യും. റെറ്റിങ്ങില്‍ കൃത്വിമത്വം കാണിച്ച് അധിക പരസ്യ വരുമാനങ്ങളും നേടിയിട്ടുണ്ട്. ഇതും അന്വേഷിക്കും. റിപ്പബ്ലിക് ചാനലിന്റെ ബാങ്ക് അക്കൗണ്ടുകള്‍ പരിശോധിക്കും. കുറ്റകൃത്യം നടന്നുവെന്ന് വ്യക്തമായാല്‍ ചാനലിന്റെ ബാങ്ക് അകൗണ്ടുകള്‍ മരവിപ്പിക്കുന്നതടക്കമുള്ള കടുത്ത നടപടികളുണ്ടാകുമെന്ന് മുംബൈ പോലീസ് മേധാവി പരമവീര്‍ സിംഗ് വ്യക്തമാക്കി.
റേറ്റിംഗ് കണക്കാക്കുന്നതിനായി ഗാര്‍ഹിക ഉപഭോക്താക്കളുടെ ഡാറ്റ ഉപയോഗിക്കുകയും ഇതില്‍ കൃത്രിമത്വം കാണിച്ച് നിയമവിരുദ്ധമായി പരസ്യവരുമാനം നേടിയെടുത്തുവെന്നുമാണ് കണ്ടെത്തല്‍. വഞ്ചനാപരമായ നിലപാടാണ് ഇതെന്ന് പൊലീസ് അറിയിച്ചു.