അബുദാബി: ഇത്തിഹാദ് എയര്‍ലൈനിന്റെ അബുദാബിയില്‍നിന്നുള്ള മുഴുവന്‍ സര്‍വ്വീസുകളും പുതിയ അബുദാബി അന്താരാഷ്ട്ര വിമാനത്താവളത്തിലേക്ക് മാറ്റി. ഇതിന്റെ ഭാഗമായി നഗരവാസികള്‍ക്ക് തങ്ങളുടെ യാത്ര കൂടുതല്‍ എളുപ്പമാക്കുന്നതിന്റെ ഭാഗമായി ഇത്തിഹാദ് യാത്രക്കാര്‍ക്ക് നഗരത്തിലെ സിറ്റി ടെര്‍മിനലില്‍ സൗജന്യ ചെക്ക് ഇന്‍ സൗകര്യം അനുവദിച്ചു.
അടുത്ത ഒരു മാസക്കാലത്തേക്കാണ് സൗജന്യ സേവനം നല്‍കിയിട്ടുള്ളത്.
മൊറാഫിക് ഏവിയേഷന്റെ കീഴില്‍ മീന തുറമുഖത്തും അബുദാബി എക്‌സിബിഷന്‍ കേന്ദ്രത്തിലും (അഡ്‌നെക്)പ്രവര്‍ത്തിക്കുന്ന ഓഫ് എയര്‍പോര്‍ട്ട് ചെക്ക് ഇന്‍ കേന്ദ്രങ്ങളിലാണ് സൗജന്യ ചെക്ക് ഇന്‍ ഏര്‍പ്പെടുത്തിയിരിക്കുന്നത്.
മിന തുറമുഖത്തെ ചെക്ക് ഇന്‍ സൗകര്യം 24 മണിക്കൂറും പ്രവര്‍ത്തിക്കും. എക്‌സിബിഷന്‍ സെന്ററില്‍ രാവിലെ 9 മുതല്‍ രാത്രി 9 വരെയുമാണ് പ്രവര്‍ത്തിക്കുന്നത്.എത്തിഹാദിനു പുറമെ എയര്‍ അറേബ്യ, വിസ് എയര്‍, ഈജിപ്റ്റ് എയര്‍ എന്നിവയുടെ യാത്രക്കാര്‍ക്ക് ഇവിടെ കുറഞ്ഞ നിരക്കില്‍ ചെക്ക് ഇന്‍ സൗകര്യം പ്രയോജനപ്പെടുത്താന്‍ കഴിയും.
വിമാനസമയത്തിനു 4 മുതല്‍ 24 മണിക്കൂര്‍ മുന്‍പ് വരെ ഇവിടെ ബാഗേജുകള്‍ നല്‍കി ചെക്ക് ഇന്‍ നടത്തി ബോര്‍ഡിങ് പാസ് ലഭിക്കുന്നതിന് സൗകര്യം ഒരുക്കിയിട്ടുണ്ട്. വരും ദിവസങ്ങളിൽ കൂടുതൽ എയർലൈനുകൾ പുതിയ എയർപോർട്ടിലേക്ക് മാറ്റും.