തിരുവനന്തപുരം: നിയമസഭാ കയ്യാങ്കളി കേസില്‍ സിപിഎം നേതാവ് ഇ.പി ജയരാജന്‍ ഇന്ന് കോടതിയില്‍ ഹാജരാകില്ല. അസുഖബാധിതനാണെന്ന് ചൂണ്ടിക്കാട്ടിയാണ് കോടതിയില്‍ ഹാജരാകാതിരിക്കുന്നത്. അനാരോഗ്യം കാരണം കണ്ണൂരിലെ വീട്ടില്‍ വിശ്രമത്തിലാണെന്ന് കോടതിയെ അറിയിക്കും.
വിചാരണ നടപടികള്‍ ഇന്നു ആരംഭിക്കാനിരിക്കെ കേസിലെ ഇ.പി ജയരാജന്‍ ഉള്‍പ്പെടെ ആറു പ്രതികളും ഇന്ന് ഹാജരാകണമെന്ന് തിരുവനന്തപുരം സിജെഎം കോടതി ഉത്തരവിട്ടിരുന്നു. മന്ത്രി വി.ശിവന്‍കുട്ടി, കെ.ടി ജലീല്‍ എം.എല്‍.എ, കെ. അജിത്, സി.കെ സദാശിവന്‍, കെ. കുഞ്ഞുമുഹമ്മദ് എന്നിവരാണ് കേസിലെ മറ്റു പ്രതികള്‍. ഇവര്‍ ഇന്ന് കോടതിയില്‍ ഹാജരാകുമെന്നാണ് വിവരം.