ചീഞ്ഞു നാറുന്ന പൊലീസ് വകുപ്പ്

എ.ഡി.ജി.പി സുധേഷ്‌കുമാര്‍ പൊലീസുകാരെ കൊണ്ട് അടിമപ്പണി ചെയ്യിച്ചെന്ന ഇന്റലിജന്‍സ് റിപ്പോര്‍ട്ട് പുറത്തുവന്നതോടെ ഉന്നത ഉദ്യോഗസ്ഥരും രാഷ്ട്രീയ നേതാക്കളും പൊലീസുകാരെക്കൊണ്ട് വിടുവേല ചെയ്യിപ്പിക്കുന്നതിന്റെ നാറുന്ന കഥകള്‍ക്കാണ് നമ്മുടെ നാട് സാക്ഷ്യം വഹിച്ചുകൊണ്ടിരിക്കുന്നത്. കണക്കുകള്‍ കള്ളം പറയില്ലെങ്കില്‍ സംസ്ഥാനത്ത് ഐ.പി.എസ് ഉദ്യോഗസ്ഥരുടേയും രാഷ്ട്രീയ നേതാക്കളുടേയും വീടുകളില്‍ രണ്ടായിരത്തോളം പൊലീസുകാര്‍ ദാസ്യവേല ചെയ്യുന്നുവെന്ന യാഥാര്‍ത്ഥ്യം മലയാളികള്‍ വിശ്വസിച്ചേ മതിയാകൂ. നമ്മുടെ നാടിന്റെ സുരക്ഷിതത്വം ഉറപ്പുവരുത്തുകയെന്ന ചുമതല നിര്‍വഹിക്കേണ്ടവരാണ് ഇത്തരം പ്രവര്‍ത്തനങ്ങള്‍ക്ക് നിയോഗിക്കെപ്പടുന്നതെന്നാലോചിക്കുമ്പോഴാണ് സംഭവത്തിന്റെ ഗൗരവം ബോധ്യപ്പെടുക.
വീട്ടിലെ മരാമത്ത് പണികള്‍, ഏമാന്‍മാരുടെ ഭാര്യമാരെയും മക്കളേയും അവര്‍ പറയുന്നിടങ്ങളിലെല്ലാം കൊണ്ടു പോകല്‍, വളര്‍ത്തു മൃഗങ്ങള്‍ക്ക് തീറ്റവാങ്ങിക്കൊടുക്കല്‍, അവറ്റകളെ കുളിപ്പിക്കല്‍ തുടങ്ങിയ സേവനങ്ങളാണ് ഇത്തരം പൊലീസുകാര്‍ ചെയ്ത് തീര്‍ക്കേണ്ടത്. ജോലകളില്‍ വല്ല വീഴ്ച്ചയും സംഭവിക്കുകയോ തങ്ങള്‍ ഉദ്ദേശിച്ചപോലെ മികവ് പ്രകടിപ്പിക്കുകയോ ചെയ്തിട്ടില്ലെങ്കില്‍ കൊടിയ മര്‍ദ്ദനങ്ങളാണ് കൊച്ചമ്മമാരില്‍ നിന്നും കൊച്ചേമാന്‍മാരില്‍നിന്നും ഈ പാവങ്ങള്‍ക്ക് ഏല്‍ക്കേണ്ടി വരുന്നത്. മേലുദ്യോഗസ്ഥരുടെ തൊഴിലിടങ്ങളിലോ കുടുംബങ്ങളിലോ ഉണ്ടാവുന്ന അനിഷ്ടങ്ങളുടെയെല്ലാം പാപ ഭാരം പേറേണ്ടി വരുന്നതും ഇവരാണ്. പൊലീസ് ഉദ്യോഗസ്ഥര്‍ക്ക് പുറമെ ബറ്റാലിയനുകളില്‍ ജോലി ചെയ്യേണ്ട ക്യാമ്പ് ഫോളോവേഴ്‌സ് എന്ന ഓമനപ്പേരില്‍ അറിയപ്പെടുന്ന ഉദ്യോഗസ്ഥരും ഈ ഗതികേട് അനുഭവിക്കേണ്ടി വരുന്നുണ്ട്. ഐ.പി.എസുകാരുടെ വീടുകളില്‍ ആളെ നിര്‍ത്താന്‍ കേന്ദ്രസര്‍ക്കാര്‍ 9000 രൂപ അലവന്‍സ് അനുവദിക്കുന്ന സാഹചര്യത്തിലാണ് ഇത്തരം നിവൃത്തികേടുകള്‍ക്ക് പൊലീസുകാര്‍ ഇരയാവുന്നത്.
എ.ഡി.ജി.പി സുദേഷ്‌കുമാറിന്റെ മകള്‍ ആക്രമിച്ചുവെന്ന് കാണിച്ച് പൊലീസ് ഡ്രൈവര്‍ ഗവാസ്‌കര്‍ പരാതി നല്‍കിയതോടെയാണ് സംഭവങ്ങളുടെ ചുരുളഴിയുന്നത്. സുധേഷ് കുമാര്‍ പദവിയും ഔദ്യോഗിക വാഹനവും ദുരുപയോഗം ചെയ്‌തെന്നാണ് ഇന്റലിജന്‍സ് വിഭാഗത്തിന്റെ കണ്ടെത്തല്‍. കുടുംബം പൊലീസുകാരോട് മോശമായി പെരുമാറുന്നത് സുധേഷ് കുമാറിന് അറിയാമായിരുന്നു. ഇത് തടഞ്ഞില്ലെന്ന് മാത്രമല്ല എ.ഡി.ജി.പി തന്നെ ക്യാമ്പ് ഫോളോവേഴ്‌സിനെ അസഭ്യം പറയുകയും ചെയ്തു. തിരുവനന്തപുരത്ത് നിന്ന് ബന്ധുവിനെ കണ്ണൂരില്‍ ഔദ്യോഗിക വാഹനത്തില്‍ എത്തിച്ചു. എതിര്‍പ്പ് പ്രകടിപ്പിച്ച പൊലീസുകാരെ മാനസിക പീഡനത്തിന് വിധേയരാക്കി. ഇത്തരത്തില്‍ 12 കണ്ടെത്തലുകള്‍ എ.ഡി.ജി.പിക്കെതിരായ റിപ്പോര്‍ട്ടിലുണ്ട്. ഒരു ദിവസം പെട്ടെന്നുണ്ടായ മര്‍ദനമല്ലെന്നും തുടര്‍ച്ചയായ പീഡനങ്ങള്‍ക്കൊടുവിലുണ്ടായ ആക്രമണമാണ് മര്‍ദനമെന്നും ഗവാസ്‌കര്‍ മാധ്യമങ്ങളോട് തുറന്നു പറയുകയുണ്ടായി.
അതിനിടെ എഡി.ജി.പി സുധേഷ് കുമാറിന്റെ വീട്ടില്‍ മാത്രമല്ല, കീഴുദ്യോഗസ്ഥരെ അടിമപ്പണിക്ക് നിയോഗിക്കുന്ന നിരവധി ഉന്നത ഉദ്യോഗസ്ഥര്‍ പൊലീസിലുണ്ടെന്ന് ആരോപണം ഉയര്‍ന്നിരിക്കുകയാണ്. പേരൂര്‍ക്കട എസ്.എ.പി ക്യാംപിലെ ഡെപ്യൂട്ടി കമാന്‍ഡന്റ് പി.വി രാജുവിന് എതിരെയും പരാതി ഉയര്‍ന്നിട്ടുണ്ട്. സ്വന്തം വീട്ടില്‍ ടൈലിടാന്‍ നിയോഗിച്ചത് രണ്ട് ക്യാംപ് ഫോളോവേഴ്‌സിനെയാണ്. ഒരു പകല്‍ മുഴവന്‍ അവര്‍ക്ക് ആ പണി ചെയ്യേണ്ടിവന്നു. ഇതിനിടെ എ.ഡി.ജി.പിയുടെ വീട്ടിലെ അടിമപ്പണി വാര്‍ത്തയായതോടെ അപകടം മണത്ത ഡെപ്യൂട്ടി കമാന്‍ഡന്റ് പണി മതിയാക്കി ജീവനക്കാരെ പറഞ്ഞ് വിടുകയായിരുന്നു. പി.വി. രാജുവിനെതിരെ പരാതി നല്‍കുമെന്ന് പൊലീസ് അസോസിയേഷനും ക്യാംപ് ഫോളോവേഴ്‌സ് അസോസിയേഷനും അറിയിച്ചു. എഡി.ജി.പിയുടെ ചട്ടലംഘനത്തിന്റെ തെളിവുകള്‍ ഒന്നൊന്നായി പുറത്തുവന്നിട്ടുണ്ട്. സംസ്ഥാന പൊലീസിനെതിരെ ഇടവേളകളില്ലാതെ ആരോപണങ്ങള്‍ ഉയര്‍ന്നുകൊണ്ടിരിക്കുന്ന സാഹചര്യത്തിലാണ് പുതിയവാര്‍ത്തകള്‍ പുറത്തുവന്നിരിക്കുനത്. മുകള്‍ തട്ട് മുതല്‍ താഴെ തട്ട് വരെ പൊലീസ് സംവിധാനം കുത്തഴിഞ്ഞു കിടക്കുകയാണെന്ന് ഈ സംഭവങ്ങള്‍ തെളിയിക്കുന്നു. ഉന്നത ഐ.പി.എസ് ഉദ്യോഗസ്ഥന്‍മാര്‍തന്നെ നിയമ സംവിധാനങ്ങളെ നോക്കുകുത്തിയാക്കി മാറ്റുമ്പോള്‍ താഴെതട്ടിലുള്ളവരും നിയമ വിരുദ്ധ പ്രവര്‍ത്തനങ്ങളില്‍ മുഴുകുന്നു. ഈ സാഹചര്യത്തിലാണ് സ്റ്റേഷനില്‍ പരാതിക്കാരായെത്തുന്നവര്‍ പ്രതികളായിത്തീരുന്നതും അക്രമികളെ ചൂണ്ടിക്കാണിക്കൊടുക്കുമ്പോള്‍ അവര്‍ക്ക് സൗകര്യമൊരുക്കുന്നതിലേക്കും പൊലീസ് സംവിധാനം തരം താഴുന്നത്.
കഴിഞ്ഞ ദിവസമുണ്ടായ ഗണേഷ്‌കുമാര്‍ എം.എല്‍.എയുമായി ബന്ധപ്പെട്ട സംഭവങ്ങളും ഇതിനോട് ചേര്‍ത്ത് വായിക്കേണ്ടതാണ്. വാഹനത്തിന് വഴിമാറിയില്ല എന്നാരോപിച്ച് ഗണേഷ് കുമാര്‍ എം.എല്‍.എയും ജീവനക്കാരും ചേര്‍ന്ന് മര്‍ദിച്ചുവെന്ന പരാതിയാണ് ആദ്യം പൊലീസിന് മുന്നിലെത്തിയത്. ബുധനാഴ്ചയാണ് ഗണേഷ് യുവാവിനെ മര്‍ദിക്കുകയും അമ്മയെ അസഭ്യം പറയുകയും ചെയ്തത്. സംഭവം നടന്ന അന്നുതന്നെ അമ്മ ഷീന പൊലീസില്‍ പരാതി നല്‍കി. എന്നാല്‍ നാലു ദിവസം പിന്നിട്ടിട്ടും അതില്‍ കേസെടുക്കാന്‍ അവര്‍ തയാറായിട്ടില്ല. ഡി.വൈ.എസ്.പി, മുഖ്യമന്ത്രി, ഡിജിപി എന്നിവര്‍ക്കും ഷീന പരാതി നല്‍കിയിട്ടുണ്ട്. ഈ പരാതി വാര്‍ത്തയായതിന് പിന്നാലെയാണ് എം.എല്‍.എയുടെ ജീവനക്കാരുടെ പരാതിയെത്തിയത്. കാത്തിരുന്ന മട്ടില്‍ അഞ്ചല്‍ പൊലീസ് ആദ്യം അത് റജിസ്റ്റര്‍ ചെയ്തു. യുവാവിനും അമ്മയ്ക്കുമെതിരെ ജാമ്യം കിട്ടാത്ത വകുപ്പുകള്‍ ചുമത്തി. അനന്തകൃഷ്ണന്റെ പരാതിയില്‍ എം.എല്‍.എക്കും സംഘത്തിനും ജാമ്യം കിട്ടുന്ന വകുപ്പുകള്‍ ചുമത്തി എഫ്.ഐ.ആര്‍ റജിസ്റ്റര്‍ ചെയ്തു. കേസില്‍ അഞ്ചല്‍ സി.ഐക്ക് എതിരെ ആക്ഷേപം ഉയര്‍ന്നിട്ടും ഗണേഷ് ഇടപെട്ട് ഇയാളെ നിലനിര്‍ത്തുകയാണെന്നും ആക്ഷേപം ഉയര്‍ന്നിട്ടുണ്ട്.
ആഭ്യന്തര വകുപ്പിനെ പാര്‍ട്ടിക്കാരുടെ തന്നിഷ്ടത്തിന് മുന്നില്‍ അടിയറവെച്ചതിന്റെ തിക്തഫലമാണ് നാടിന്ന് അനുഭവിച്ചുകൊണ്ടിരിക്കുന്നത്. പ്രതികളാക്കപ്പെടുന്ന പ്രവര്‍ത്തകരേയും അനുഭാവികളേയും ഇറക്കിക്കൊണ്ടുവരുമ്പോള്‍ കൈയ്യും കെട്ടിനോക്കിനില്‍ക്കുന്നതിന് പ്രത്യുപകാരമെന്നോണം പൊലീസിന്റെ ഭാഗത്തുനിന്നുള്ള വീഴ്ച്ചകള്‍ക്ക് മുമ്പില്‍ കണ്ണടച്ചുകൊടുക്കേണ്ടതിന്റെ ഗതികേടിലാണ് വകുപ്പ് കൈകാര്യംചെയ്യുന്ന മുഖ്യമന്ത്രി എത്തിനില്‍ക്കുന്നത്.മുഖ്യമന്ത്രിക്കെതിരെ വി.ഡി സതീശന്‍ എം.എല്‍.എ കഴിഞ്ഞ ദിവസം ഉന്നയിച്ച അവകാശലംഘനത്തിലെ വിഷയം ഇതാണ് ചൂണ്ടിക്കാണിക്കുന്നത്. കഴിഞ്ഞ നിയമസഭാ സമ്മേളനത്തില്‍ നക്ഷത്ര ചിഹ്നമിടാത്ത 4403 നമ്പര്‍ ചോദ്യമായ ക്യാമ്പ് ഫോളോവര്‍ തസ്തികകളിലെ ജീവനക്കാരില്‍ എത്ര പേരെ ഉന്നത പൊലീസ് ഉദ്യോഗസ്ഥരുടെ വീട്ടില്‍ ജോലിക്കായി നിയോഗിച്ചിട്ടുണ്ടെന്ന ചോദ്യത്തിന്, ക്യാമ്പ് ഫോളോവര്‍ തസ്തികകളിലെ ജീവനക്കാരെ ഉന്നത ഉദ്യോഗസ്ഥരുടെ വീടുകളില്‍ ജോലിക്കായി നിയോഗിക്കാറില്ല എന്ന മറുപടിയാണ് മുഖ്യമന്ത്രി നല്‍കിയത്. എന്നാല്‍ ഇത്രയും ക്യാമ്പ് ഓഫീസര്‍ മാര്‍ ജോലിചെയ്യുന്നുണ്ടെന്ന വിവരം നിയമസഭയിലും പൊതു ജനത്തിനു മുന്നിലും മറച്ചുവെക്കേണ്ടി വന്നത് ഈ സഹകരണത്തിന്റെ ഫലമാണ്.