ലൈംഗികാരോപണ കേസില്‍ അന്വേഷണം നേരിടുന്ന എം. മുകേഷ് എം.എല്‍.എയെ സംരക്ഷിക്കുന്ന സി.പി.എം സംസ്ഥാന നേതൃത്വത്തിന്റെ നിലപാടിനെതിരെ പോളിറ്റ് ബ്യൂറോ അംഗം ബൃന്ദ കാരാട്ട്. മുകേഷ് എം.എല്‍.എ സ്ഥാനം രാജിവെച്ച് അന്വേഷണം നേരിടണമെന്ന് ബൃന്ദ കാരാട്ട് ആവര്‍ത്തിച്ചു. ദുര്‍ബല വാദങ്ങളുയര്‍ത്തി പ്രതിരോധിക്കരുതെന്ന് ബൃന്ദ കാരാട്ട് പാര്‍ട്ടി വെബ്‌സൈറ്റില്‍ പ്രസിദ്ധീകരിച്ച ലേഖനത്തിലാണ് വിമര്‍ശിച്ചു. സംസ്ഥാന നേതൃത്വത്തെ വെട്ടിലാക്കുന്നതാണ് വിഷയത്തില്‍ ബൃന്ദയുടെ നിലപാട്.
ലൈംഗികാതിക്രമ കേസില്‍ ആരോപണവിധേയനായ മുകേഷ് രാജിവെക്കേണ്ടതില്ല എന്ന സിപിഎം സംസ്ഥാന നേതൃത്വത്തിന്റെ നിലപാട് അംഗീകരിക്കാനാകില്ലെന്നാണ് ബൃന്ദ കാരാട്ട് വ്യക്തമാക്കുന്നത്. മുന്‍ കാലങ്ങളില്‍ സംഭവിച്ചത് ചൂണ്ടിക്കാട്ടി രാജി വൈകിക്കുന്നത് അംഗീകരിക്കാനാകില്ല. കേസ് പ്രത്യേക അന്വേഷണസംഘം അന്വേഷിക്കുന്ന പശ്ചാത്തലത്തില്‍ മുകേഷ് രാജി വെച്ച് അന്വേഷണം നേരിടണമെന്നും ബൃന്ദ കാരാട്ട് ലേഖനത്തില്‍ വ്യക്തമാക്കി.
‘ഹേമ കമ്മിറ്റി റിപ്പോര്‍ട്ടിന്റെ അനന്തരഫലത്തെ കുറിച്ച് ചില ചിന്തകള്‍’ എന്നാണ് ലേഖനത്തിന്റെ തലക്കെട്ട്. നിങ്ങള്‍ അങ്ങനെ ചെയ്തതു കൊണ്ട് ഞാന്‍ ഇങ്ങനെ ചെയ്തുവെന്ന വിധത്തിലുള്ള നിലപാട് അല്ല വിഷയത്തില്‍ കൈക്കൊള്ളേണ്ടതെന്ന് ഹിന്ദിയിലുള്ള ഒരു പ്രയോഗത്തിലൂടെ ബൃന്ദ കാരാട്ട് ചൂണ്ടിക്കാട്ടി. ഹേമ കമ്മിറ്റി രൂപവത്കരിക്കപ്പെട്ടതിനെയും ഇടതുസര്‍ക്കാരിന്റെ നിലപാടിനെയും ലേഖനത്തില്‍ ബൃന്ദ പ്രകീര്‍ത്തിക്കുന്നുണ്ട്.
മുകേഷിന്റെ രാജിക്കാര്യത്തില്‍ സമാനമായ നിലപാടാണ് സി.പി.ഐ നേതാവായ ആനി രാജയും സ്വീകരിച്ചത്. മുകേഷ് എംഎല്‍എ സ്ഥാനം രാജിവെച്ച് അന്വേഷണത്തെ നേരിടണമെന്ന് ആനി രാജയും ആവശ്യപ്പെട്ടു. കുറ്റകൃത്യത്തെ മറ്റൊന്നുകൊണ്ട് മറയ്ക്കാനാവില്ല. ബലാത്സംഗക്കേസിലെ പ്രതിയെ കുറിച്ചുളള ചോദ്യത്തിനുളള മറുപടിയും പരിഹാരവും അതല്ലെന്നും ആനി രാജ കൂട്ടിച്ചേര്‍ത്തു.