പാലക്കാട് കേന്ദ്രമായി പ്രവര്‍ത്തിക്കുന്ന ഇന്‍സൈറ്റ് ദ് ക്രിയേറ്റീവ് ഗ്രൂപ്പിന്റെ ആറാമത് കെ. ആര്‍ . മോഹനന്‍ മെമ്മോറിയല്‍ അന്താരാഷ്ട്ര ഡോക്യുമെന്ററി ഫെസ്റ്റിവലിന് ലോകത്തിന്റെ വിവിധ ഭാഗങ്ങളില്‍ നിന്നായി ലഭിച്ച 43 ചിത്രങ്ങളില്‍ നിന്നും 21 ചിത്രങ്ങള്‍ പ്രാഥമിക സ്‌ക്രീനിംഗ് കമ്മിറ്റിയുടെ പ്രദര്‍ശനാനുമതി നേടി. ഇന്ത്യയ്ക്കു പുറമെ ഇറാഖ്, ഫ്രാന്‍സ്, ജര്‍മ്മനി, സ്‌പെയിന്‍, യു എസ് എ എന്നീ രാജ്യങ്ങളില്‍നിന്നുള്ള, ഇരുപതു മിനുട്ടില്‍ താഴെ ദൈര്‍ഘ്യമുള്ള, ഈ ഡോക്യൂമെന്ററികള്‍ ഫെബ്രുവരി 19 നു പാലക്കാട് ലയണ്‍സ് സ്‌കൂളിലെ ഗോള്‍ഡന്‍ ജൂബിലിഹാളില്‍ നടക്കുന്ന ഫെസ്റ്റിവലില്‍ പ്രദര്‍ശിപ്പിക്കും. ഓരോ ഡോക്യൂമെന്ററിയുടെയും പ്രദര്‍ശനശേഷം അതിന്റെ അണിയറപ്രവര്‍ത്തകരുമായി കാണികള്‍ നടത്തുന്ന ഓപ്പണ്‍ ഫോറം ചര്‍ച്ച ഈ മേളയുടെ പ്രത്യേകതയാണ്.
വൈകീട്ടു നടക്കുന്ന സമാപന യോഗത്തില്‍ ഡോക്യുമെന്ററി മേഖലയിലെ പ്രശസ്തരടങ്ങുന്ന ജൂറി തെരഞ്ഞെടുക്കുന്ന ഡോക്യൂമെന്ററിക്ക് കെ. ആര്‍ . മോഹനന്‍ മെമ്മോറിയല്‍ ട്രോഫിയും, പതിനായിരം രൂപയും പ്രശസ്തി പത്രവും സമ്മാനിക്കും. ഇന്‍സൈറ്റ് അവാര്‍ഡ് ജേതാവ് അന്തരിച്ച ചലച്ചിത്രകാരന്‍ കെ. പി. ശശിയുടെ സ്മരണാര്‍ത്ഥം അദ്ദേഹത്തിന്റെ ഒരു ഡോക്യൂമെന്ററിയും ഈ മേളയുടെ ഭാഗമായി പ്രദര്‍ശിപ്പിക്കും. 2022 ഡിസംബറില്‍ ഇന്‍സൈറ്റ് നടത്തിയ പ്രഥമ ഗാന-ദൃശ്യ അവാര്‍ഡ് മത്സര ജേതാക്കള്‍ക്കുള്ള സമ്മാനദാനം ഇതേ യോഗത്തില്‍വച്ച് നിര്‍വ്വഹിക്കും. തുടര്‍ന്ന്, അന്തരിച്ച കെ. ആര്‍. മോഹനന്റെ സ്മരണാര്‍ത്ഥം വര്‍ഷം തോറും നടത്തുന്ന ‘മോഹനസ്മൃതി’യില്‍ ചലച്ചിത്ര-ഡോക്യൂമെന്ററി മേഖലയിലെ പ്രമുഖര്‍ പങ്കെടുക്കും. പ്രവേശനം സൗജന്യം.