സിനിമാ താരവും ദേശീയ വനിതാ കമ്മിഷന്‍ അംഗവുമായ ഖുശ്!ബു സുന്ദറിനെ അപമാനിച്ച ഡിഎംകെ വക്താവ് ശിവാജി കൃഷ്ണമൂര്‍ത്തിയെ പാര്‍ട്ടിയില്‍നിന്ന് പുറത്താക്കി. എല്ലാ പദവികളില്‍നിന്നും ശിവാജി കൃഷ്ണമൂര്‍ത്തിയെ നീക്കിയതായി ജനറല്‍ സെക്രട്ടറി ദുരൈമുരുകന്‍ വ്യക്തമാക്കി. ഖുശ്ബുവിനെതിരായ സ്ത്രീവിരുദ്ധ പരാമര്‍ശത്തെ തുടര്‍ന്നാണ് നടപടി. ശിവാജിക്കെതിരെ കൊടുങ്ങയൂര്‍ പൊലീസ് കേസെടുത്തു.
ഗവര്‍ണര്‍ക്കെതിരായ പരാമര്‍ശത്തിന് ജനുവരിയില്‍ ശിവാജിയെ സസ്‌പെന്‍ഡ് ചെയ്തിരുന്നു. ഇതില്‍ മാപ്പ് പറഞ്ഞതിനെ തുടര്‍ന്ന് അടുത്തിടെയാണ് ശിവാജിയെ പാര്‍ട്ടിയില്‍ തിരിച്ചെടുത്തത്. ശിവാജിയുടെ പരാമര്‍ശത്തിനെതിരെ രംഗത്തെത്തിയ ഖുശ്ബു, മാധ്യമങ്ങള്‍ക്ക് മുന്നില്‍ വികാരാധീനയായി.
ഡിഎംകെ സ്ത്രീവിരുദ്ധ പ്രസ്താവന നടത്തുന്നവരുടെ താവളമായി മാറിയെന്ന് ഖുശ്ബു പ്രതികരിച്ചു. പതിവായി അവഹേളനം നടത്തുന്നയാളാണ് ഇയാള്‍. ഇത്തരത്തിലുള്ള നിരവധി ആളുകളാണ് ഡിഎംകെയിലുള്ളത്. സ്ത്രീകളെ അവഹേളിച്ച് സംസാരിക്കുന്നവര്‍ക്കാണ് ഡിഎംകെ അവസരങ്ങള്‍ നല്‍കുന്നത് ഖുശ്ബു പ്രതികരിച്ചു.