തന്നെ തിഹാര്‍ ജയിലില്‍ അടച്ചത് ബിജെപിയില്‍ ചേരാന്‍ തയ്യാറാവാതിരുന്നതുകൊണ്ടാണെന്ന് കര്‍ണാടകയിലെ കോണ്‍ഗ്രസ് അധ്യക്ഷന്‍ ഡി കെ ശിവകുമാര്‍.
എന്തിനാണ് തിഹാര്‍ ജയിലില്‍ പോയതെന്ന ബിജെപി മന്ത്രി കെ എസ് ഈശ്വരപ്പയുടെ ചോദ്യത്തിന് പ്രതികരിക്കുകയായിരുന്നു ശിവകുമാര്‍. ബിജെപിയെ പിന്തുണയ്ക്കാത്തതിനാലാണ് തന്നെ ജയിലില്‍ അടച്ചതെന്നും ഇതു പറയുന്നത് തെളിവുകളുടെ അടിസ്ഥാനത്തിലാണെന്നും ശിവകുമാര്‍ പറഞ്ഞു.
എന്‍ഫോഴ്‌സ്‌മെന്റ് ഡയറക്ടറേറ്റ് കള്ളപ്പണം വെളുപ്പിക്കല്‍ കേസിലാണ് ശിവകുമാറിനെ അറസ്റ്റ് ചെയ്തിരുന്നത്. തുടര്‍ന്ന് 2019ല്‍ അദ്ദേഹത്തിന് 50 ദിവസം ജയിലില്‍ കഴിയേണ്ടിവന്നിരുന്നു.