പഴനി ക്ഷേത്രത്തില്‍ ഭക്തര്‍ക്ക് വിതരണംചെയ്യുന്ന പഞ്ചാമൃതത്തില്‍ പുരുഷ ലൈംഗികശേഷി ഇല്ലാതാക്കുന്ന മരുന്ന് ചേര്‍ക്കുന്നുണ്ടെന്ന പരാമര്‍ശത്തില്‍ സംവിധായകന്‍ അറസ്റ്റില്‍. പ്രശസ്ത തമിഴ് ചലച്ചിത്ര സംവിധായകന്‍ മോഹന്‍ ജി.യെയാണ് തിരുച്ചിറപ്പള്ളി പോലീസ് അറസ്റ്റ് ചെയ്തത്. ഒരു യൂട്യൂബ് ചാനലിന് നല്‍കുന്ന അഭിമുഖത്തിലാണ് മോഹന്‍ വിവാദ പരാമര്‍ശം നടത്തിയത്.
ദ്രൗപതി, രുദ്രതാണ്ഡവം, ബകാസുരന്‍ തുടങ്ങിയ സിനിമകളിലൂടെ ശ്രദ്ധേയനായ സംവിധായകനാണ് മോഹന്‍ ജി. തിരുച്ചിറപ്പള്ളി പൊലീസിന്റെ സൈബര്‍ ക്രൈം യൂണിറ്റാണ് സംവിധായകനെ അറസ്റ്റ് ചെയ്തത്.
അഭിമുഖത്തിന്റെ വീഡിയോ വ്യാപകമായി പ്രചരിച്ചതോടെ സംവിധായകനെതിരെ രൂക്ഷ വിമര്‍ശനവുമായി നിരവധി പേരാണ് രംഗത്തുവന്നത്.
പഴനിയിലെ പഞ്ചാമൃതത്തേക്കുറിച്ച് വ്യാജവാര്‍ത്തകള്‍ പ്രചരിപ്പിക്കുന്നവര്‍ക്കെതിരെ കര്‍ശന നടപടി സ്വീകരിക്കണമെന്ന് തമിഴ്‌നാട് ഹിന്ദു റിലീജിയസ് ആന്‍ഡ് ചാരിറ്റബിള്‍ എന്‍ഡോവ്‌മെന്റ് വകുപ്പ് മന്ത്രി ശേഖര്‍ ബാബു ആവശ്യപ്പെട്ടു.