ബ്രിഗേഡിയർക്കും ഉയർന്ന റാങ്കിലുള്ള ഉദ്യോഗസ്ഥർക്കും പേരന്റ് കേഡറും നിയമനവും പരിഗണിക്കാതെ ഒരു പൊതു യൂണിഫോം സ്വീകരിക്കാൻ ഇന്ത്യൻ സൈന്യം തീരുമാനിച്ചു. അടുത്തിടെ സമാപിച്ച ആർമി കമാൻഡേഴ്‌സ് കോൺഫറൻസിലെ വിശദമായ ചർച്ചകൾക്കും കൂടിയാലോചനകൾക്കും ശേഷമാണ് തീരുമാനം.റെജിമെന്റേഷന്റെ അതിരുകൾക്കപ്പുറം മുതിർന്ന നേതൃത്വങ്ങൾക്കിടയിൽ പൊതുവായ ഐഡന്റിറ്റിയും സമീപനവും പ്രോത്സാഹിപ്പിക്കുന്നതിനും ശക്തിപ്പെടുത്തുന്നതിനുമായാണ് നടപടി.
ഫ്‌ളാഗ് റാങ്കിലുള്ള (ബ്രിഗേഡിയറും അതിനുമുകളിലും) മുതിർന്ന ഉദ്യോഗസ്ഥരുടെ, ഹെഡ്ഗിയർ, ഷോൾഡർ റാങ്ക് ബാഡ്‌ജുകൾ, ഗോർഗെറ്റ് പാച്ചുകൾ, ബെൽറ്റ്, ഷൂസ് എന്നിവ ഒരേ തരത്തിലാകും. ഫ്ലാഗ് റാങ്കിലുള്ള ഉദ്യോഗസ്ഥർ ഇപ്പോൾ ലാനിയാർഡ് ധരിക്കില്ല. മാറ്റങ്ങൾ ഓഗസ്റ്റ് മുതൽ നടപ്പിലാക്കും.കേണൽമാരും ആ റാങ്കിന് താഴെയുള്ള ഉദ്യോഗസ്ഥരും ധരിക്കുന്ന യൂണിഫോമിന് മാറ്റമില്ല.